Agenda item

 

Adeiladu 17 o dai fforddiadwy, mynedfa, llefydd parcio, tirlunio a gwaith cysylltiol.

 

AELOD LLEOL: Cynghorydd Cemlyn Williams

 

Dolen i'r dogfennau cefndir perthnasol

PENDERFYNIAD: Dirprwyo'r hawl i ganiatáu yn ddarostyngedig i lofnodi Cytundeb 106 er mwyn sicrhau cyfraniad ariannol i wella'r ffyrdd / gosod mesurau tawelu traffig a darparu llecynnau agored.

 

Amodau:

1. Pum mlynedd.
2. Yn unol â’r cynlluniau a’r dogfennau a gyflwynwyd gyda'r cais.
3. Llechi naturiol.
4. Amodau ac priffyrdd.
5. Cynllun plannu coed.
6. Amodau mesurau lliniaru bioamrywiaeth i gynnwys cydymffurfio gyda gofynion yr asesiad Ecolegol Rhagarweiniol; darparu Cynllun Atal Llygredd; sicrhau bod y safle yn hydraidd i ddraenogod a chyflwyno cynllun gwelliannau bioamrywiaeth. 
7. Cyfyngu oriau gweithio rhwng 08:00-18:00 Dydd Llun i Ddydd Gwener, 08:00-13:00 Dydd Sadwrn a ddim o gwbl ar Ddydd Sul a Gŵyl y Banc.
8. Cytuno ar fanylion parthed enw Cymraeg i'r datblygiad ynghyd ag arwyddion sy'n hysbysu ac yn hyrwyddo'r datblygiad o fewn ac oddi allan y safle.
9. Tynnu hawliau datblygu o'r tai fforddiadwy.
10. Sicrhau cynllun/trefniadau ar gyfer darparu'r tai fforddiadwy.
11. Cyflwyno Cynllun Rheoli Amgylcheddol i gynnwys sŵn, dirgryniad a llwch.
12. Sicrhau cydymffurfiaeth â Safon Prydeinig rhif BS 5837:2012.
13. Samplau o'r deunyddiau a'r lliwiau ar gyfer y tai a'r tirlunio caled a meddal.
14. Sicrhau cyfraniadau ariannol ar gyfer gwelliannau ffyrdd a llecynnau agored.
15. Gosod ffens ar hyd y terfynau.

 

Adeiladu 17 o dai fforddiadwy, mynedfa, llefydd parcio, tirlunio a gwaith cysylltiol.

 

Tynnwyd sylw at y ffurflen sylwadau hwyr

 

a)    Amlygodd y Rheolwr Cynllunio bod y cais yn cael ei gyflwyno i bwyllgor oherwydd byddai'r bwriad yn golygu codi mwy na 5 o dai. Atgoffwyd yr Aelodau bod y cais wedi ei gyflwyno i'r Pwyllgor Cynllunio ar 10/01/22 lle penderfynwyd gohirio'r cais er mwyn i'r Pwyllgor dderbyn gwybodaeth ychwanegol am yr isod:

 

·         Ymateb manylach i ymateb y Cyngor Tref a chadarnhad am y cyfnod pan gynhaliwyd yr Asesiad Trafnidiaeth

·         Cynllun manylach yn dangos mynedfeydd cerddwyr a cherbydau i'r ysgol

·         Ffotograffau / fideo yn dangos y safle mewn perthynas â'r ysgol.

·         Mwy o fanylion am y cyfyngiad cyflymder a'r mesurau tawelu traffig posib.

 

Mewn ymateb i'r gohirio, roedd yr asiant wedi cyflwyno'r wybodaeth ychwanegol isod:

 

·         Copi o’r Archwiliad Diogelwch sydd wedi ei gynnal ac y cyfeirir ato yn yr Asesiad Trafnidiaeth.

·         Datganiad gan Cadarn Consulting, Peirianwyr Priffyrdd arbenigol a gynhaliodd yr asesiad trafnidiaeth mewn ymateb i Bryderon y Pwyllgor a'r Cyngor Tref.

·         Cynllun a manylion am y mynedfeydd i gerbydau a cherddwyr i'r ysgol.

·         Datganiad ychwanegol yng nghyswllt pa mor ddibynadwy yw'r ffigyrau cyfrif traffig a chanfyddiadau'r arolwg cerddwyr a wnaed ar 7 Chwefror 2022

 

Cyfeiriwyd at ymateb i’r pryderon trafnidiaeth ac o’r amser y cynhaliwyd yr arolwg. Nodwyd bod yr asesiad wedi ei gynnal drwy ddefnyddio 'Automated Traffic Counter', a osodwyd ger y safle ar ffordd Bethel am gyfnod o saith diwrnod (dros gyfnodau o 24 awr) rhwng 21/06/21 - 28/06/21.  Mewn ymateb i bryder bod yr asesiad wedi ei gynnal oddi fewn i gyfyngiadau covid cadarnhaodd y wybodaeth ychwanegol a dderbyniwyd gan arbenigwyr priffordd yr ymgeisydd ar adeg yr arolwg traffig, bod yr ysgolion yn agored ac roedd nifer yr achosion covid yn isel.

 

Cyfeiriodd y datganiad at ddata traffig hanesyddol ar gyfer y B4366 o'r Adran Drafnidiaeth (DfT) ddaeth o'r orsaf cyfrif traffig maniwal a leolwyd tua 250m i'r Gorllewin o'r safle arfaethedig, oedd wedi casglu data traffig 10 mlynedd. Roedd y traffig blynyddol cyfartalog cymedr (AADT) o'r data 10 mlynedd gan y DfT i'r ffordd yma wedi ei gyfrif fel 5,389 ( cyfrif AADT o'r data cyfrif traffig awtomatig a gasglwyd yn ystod arolwg Mehefin 2021 wedi ei gynnwys yn yr adroddiad) 

 

Mewn ymateb i bryderon yr aelodau ynghylch amseroedd brig yr ysgol a cherddwyr, fe wnaeth ymgynghorwyr priffyrdd yr ymgeisydd asesiad cerddwyr ar 7 Chwefror 2022. Darganfu’r asesiad fod mwyafrif y disgyblion yn defnyddio'r pafin gorllewinol i gerdded i'r ysgol ond bod 90% yn cael eu gollwng yn yr encilfa ddwyreiniol gan ddefnyddio'r ddarpariaeth croesi ddiogel ar y ffordd. Dylid nodi na fydd y bwriad yn arwain at golli darpariaeth parcio. Darperir parcio o fewn y safle i ddisodli'r ardal a gollir ar yr encilfa.

 

Adroddwyd bod Cyngor Tref Caernarfon yn parhau i bryderu am y cais gan awgrymu gohirio penderfyniad fel bod modd cael mwy o wybodaeth a chais i gyfarfod gyda Swyddogion yr Adran Priffyrdd ar y safle. Nodwyd mai dyletswydd yr ymgeisydd yw cyflwyno gwybodaeth i alluogi’r Awdurdod Cynllunio Lleol asesu cais cynllunio ac yn yr achos yma ystyriwyd bod yr ymgeisydd wedi mynd tu hwnt i’r anghenion polisi i asesu effaith y bwriad a darparu gwybodaeth ychwanegol, wedi ei gynnal gan beirianwyr priffordd cymwys mewn ymateb i bryderon y pwyllgorau. Ategwyd bod yr ymgeisydd wedi cynnig cyfraniad ariannol i'r Gwasanaeth Trafnidiaeth fel bod modd rhoi mesurau tawelu traffig / gwelliannau priffyrdd yn eu lle i wella diogelwch y briffordd.

 

Ystyriwyd y byddai’r bwriad i ddatblygu 17 o dai fforddiadwy yn ymateb positif i anghenion tai amrywiol sydd wedi’u hadnabod yn yr ardal. Nid oedd gwrthwynebiad i ddyluniad y tai ac ni ystyriwyd y byddai’r bwriad yn cael effaith sylweddol ar fwynderau preswyl tai cyfagos. Nodwyd bod yr Uned Trafnidiaeth y Cyngor wedi cyflwyno sylwadau yn datgan na fyddai'r bwriad yn amharu yn andwyol ar ddiogelwch ffyrdd er y cydnabuwyd y sylwadau a dderbyniwyd yn gwrthwynebu’r cais ar sail diogelwch ffyrdd. Gydag amodau a nodiadau perthnasol er mwyn sicrhau bydd y gwaith yn cael ei gwblhau i safonau statudol a chyfraniad ariannol trwy gytundeb 106 i sicrhau gwelliannau ffyrdd, ystyriwyd fod y bwriad yn dderbyniol ar sail gofynion Polisi ISA 1, TRA 2 a TRA 4 o’r CDLL. 

 

b)    Yn manteisio ar yr hawl i siarad, nododd yr Aelod Lleol yn sylwadau canlynol:

·         Ei fod yn diolch am yr adroddiad cynhwysfawr

·         Ei fod yn diolch i’r swyddogion am y wybodaeth ychwanegol ac am y berthynas dda roedd wedi ei feithrin gyda swyddogion Adra

·         Bod diogelwch y plant yn parhau yn bryder iddo

 

Cyflwynodd fideo o daith mewn car ar hyd y ffordd o flaen yr ysgol yn ystod cyfnodau prysur

 

c)    Cynigiwyd ac eiliwyd caniatáu y cais

 

d)    Yn ystod y drafodaeth ddilynol nodwyd y sylwadau canlynol gan aelodau:

·         Diolchwyd i’r Aelod Lleol am y fideo – cyfraniad defnyddiol iawn

·         Er cydymdeimlad, bod pob cais sy’n cael ei wrthod am resymau trafnidiaeth bob amser yn cael eu colli ar apêl

·         Bod trafnidiaeth yn achosi problemau o flaen pob ysgol

·         Bod gwir angen am dai fforddiadwy yn yr ardal - hyn yn cyd-fynd gyda Strategaeth Tai Cyngor Gwynedd

·         Angen osgoi apêl a chostau i’r Cyngor

·         Y wybodaeth ychwanegol wedi bod yn fuddiol

·         Bodlon bod y materion trafnidiaeth yn dderbyniol a diogel

 

PENDERFYNWYD: Dirprwyo'r hawl i ganiatáu yn ddarostyngedig i lofnodi Cytundeb 106 er mwyn sicrhau cyfraniad ariannol i wella'r ffyrdd / gosod mesurau tawelu traffig a darparu llecynnau agored.

 

Amodau:

1.         Pum mlynedd.

2.         Yn unol â’r cynlluniau a’r dogfennau a gyflwynwyd gyda'r cais.

3.         Llechi naturiol.

4.         Amodau priffyrdd.

5.         Cynllun plannu coed.

6.         Amodau mesurau lliniaru bioamrywiaeth i gynnwys cydymffurfio gyda gofynion yr asesiad Ecolegol Rhagarweiniol; darparu Cynllun Atal Llygredd; sicrhau bod y safle yn hydraidd i ddraenogod a chyflwyno cynllun gwelliannau bioamrywiaeth. 

7.         Cyfyngu oriau gweithio rhwng 08:00-18:00 Dydd Llun i Ddydd Gwener, 08:00-13:00 Dydd Sadwrn a ddim o gwbl ar Ddydd Sul a Gŵyl y Banc.

8.         Cytuno ar fanylion parthed enw Cymraeg i'r datblygiad ynghyd ag arwyddion sy'n hysbysu ac yn hyrwyddo'r datblygiad o fewn ac oddi allan y safle.

9.         Tynnu hawliau datblygu o'r tai fforddiadwy.

10.       Sicrhau cynllun/trefniadau ar gyfer darparu'r tai fforddiadwy.

11.       Cyflwyno Cynllun Rheoli Amgylcheddol i gynnwys sŵn, dirgryniad a llwch.

12.       Sicrhau cydymffurfiaeth â Safon Prydeinig rhif BS 5837:2012.

13.       Samplau o'r deunyddiau a'r lliwiau ar gyfer y tai a'r tirlunio caled a meddal.

14.       Sicrhau cyfraniadau ariannol ar gyfer gwelliannau ffyrdd a llecynnau agored.

15.       Gosod ffens ar hyd y terfynau.