Agenda item

Cyflwyno adroddiad Rheolwr Masnachol Hafan a Harbwr Pwllheli.

Nodi a derbyn yr adroddiad

Cyfeiriwyd at yr adroddiad oedd wedi ei chreu gan Reolwr Masnachol Hafan a Harbwr Pwllheli gan adrodd fel a ganlyn :

Adroddwyd bod rhybudd i forwyr wedi cael ei gyflwyno er mwyn rhagrybuddio bod gwaith o garthu’r sianel yn parhau ar 8fed Mawrth gam gyfnod o wythnos. Cydnabuwyd bod y gwaith hwn yn parhau i fod yn her i’r gwasanaeth a bod swyddogion yn cydweithio gydag Ymgynghoriaeth Gwynedd i ganfod datrysiad i’r sefyllfa. Eglurwyd bod tua 12,000 o dunelli yn mynd i gael ei dynnu o geg yr harbwr yn ystod y cyfnod hwn. Sicrhawyd bod arolwg hydrograffig wedi cael ei gwblhau ar yr ardal briodol a bydd contractwyr yn defnyddio teclynnau arbenigol er mwyn sicrhau eu bod yn gweithio yn y lleoliad cywir ac yn tynnu’r swm cywir o dywod o’r safle.

Eglurwyd bod gwaith wedi cael ei gwneud ar yr hen ynys, yn dilyn oediad yn sgil cytuno ar gostau contractwyr. Diolchwyd i Gynghorwyr lleol am gynorthwyo i ymgysylltu gyda thrigolion lleol Bron y De a Morfa Garreg am y gwaith a gwblhawyd gan swyddogion. Nodwyd bydd y lagŵn distyllu yn cael ei wagio’n rhannol. Eglurwyd bod swyddogion wedi torri’r gwair ar yr ynys yn ddiweddar ac wedi canfod bod y tir yn rhy wlyb i osod y gwaddod gwlyb arno i’w sychu. O ganlyniad, cadarnhawyd mai oddeutu 10,000 tunnell bydd yn cael ei wagio o’r lagŵn distyllu yn lle ei wagio’n gyfan gwbl.

Cadarnhawyd y dymunir cwblhau’r gwaith ar yr ynys yn ystod mis Mawrth cyn symud ymlaen i garthu tywod o rhai adrannau. Adroddwyd bydd modd carthu oddeutu 10,000 tunnell o fasn y marina yn cael ei wneud unwaith bydd gwaith ar yr hen ynys wedi’i gwblhau. Ymhelaethwyd bydd arolwg hydrograffig yn cael ei wneud ar y safle er mwyn sicrhau bod y gwaith cywir yn cael ei gwblhau. Cydnabuwyd bod gwaith cyfathrebu gyda cymdogion am y gwaith hwn wedi bod yn ddiffygiol ar ddechrau’r broses ond mae pob ymdrech yn cael ei wneud i’w wella i’r dyfodol.

Mewn ymateb i ymholiad ar dderbyn trwydded gan Gyfoeth Naturiol Cymru ar gyfer pwmpio’r gwaddod i ‘r traeth agosaf (traeth Glandon) yn hytrach na’i gludo ymhellach, cadarnhaodd y Rheolwr Masnachol bod y tywod wedi cael ei asesu a'i fod yn glir ac y bydd yn cael ei ddefnyddio ar draeth Carreg y Defaid oherwydd ei fod o dan reolaeth y  Cyngor. Nid oes modd ei gludo i draeth Glandon oherwydd mae’r traeth dan reolaeth Cyfoeth Naturiol Cymru ac nid yw’r tywod yn pasio eu profion yn ddigonol i gael ei bwmpio yno. Eglurwyd bod y gwasanaeth wedi datblygu cynllun ar y cyd gydag Ymgynghoriaeth Gwynedd er mwyn llunio 4 opsiwn i’r dyfodol. Cadarnhawyd mai un o’r opsiynau cryfaf yw gwaredu gwaddod y basn i’r môr gan dderbyn trwydded forol gan Gyfoeth Naturiol Cymru. Ymhelaethwyd bod y gwasanaeth wedi derbyn cyfarfodydd cychwynnol gyda Chyfoeth Naturiol Cymru ac maent yn gadarnhaol iawn.

Sicrhawyd bod swyddogion yn cydweithio gyda Ymgynghoriaeth Gwynedd ar nifer o opsiynau er mwyn penderfynu ar y ffordd ymlaen i’r dyfodol a bod nifer ohonynt yn ddibynnol ar dderbyn trwydded forol. Eglurwyd bod y broses yn ddibynnol ar ofynion amrywiol ac yn broses sy’n cymryd amser. Eglurwyd ar ôl paratoi’r prosesau, mae Cyfoeth Naturiol Cymru angen edrych ar y cais hefyd. Pwysleisiwyd bod y broses yn heriol ac felly mae o am gymryd amser i’w dderbyn. Sicrhawyd bod swyddogion yn cydweithio gyda’r Prif Weithredwr ac Arweinydd y Cyngor er mwyn rhoi pwysau ar Gyfoeth Naturiol Cymru i gydweithio gyda swyddogion.

Tywyswyd drwy berfformiad ariannol yr harbwr gan nodi bod gwariant wedi cael ei wneud i uwchraddio nifer o asedau. Diolchwyd i’r gymdeithas angorfeydd am gynnal arolwg ar yr harbwr er mwyn derbyn adborth gan cwsmeriaid. Sicrhawyd bod y gwasanaeth yn gwrando ar adborth boddhad cwsmer. Rhannwyd esiampl o uwchraddio’r wifi er mwyn gwella lefelau boddhad cwsmer i’r dyfodol. Pwysleisiwyd bod boddhad cwsmeriaid a staff wedi cynyddu yn gyffredinol.

Tynnwyd sylw bod niferoedd y cychod sydd wedi angori ger yr Hafan wedi cynyddu 60% ers 2020. Eglurwyd bod incwm yr harbwr wedi cynyddu yn unol â chwyddiant. Nodwyd nad yw gwariant cyffredinol yr harbwr wedi cynyddu ar yr un raddfa oherwydd bod yr harbwr wedi defnyddio oddeutu £250,000 o gronfeydd ar gyfer gwelliannau a diweddariadau i’r harbwr. Ymfalchïwyd bod yr harbwr wedi cyrraedd cyfanswm yr angorfeydd posibl a chadarnhawyd bod rhestr aros o bobl sy’n dymuno angori eu cychod yno. Adroddwyd bod swyddogion wedi cynnal trafodaethau gyda phrif swyddogion y Cyngor ar sut gallai’r harbwr cael ei ddatblygu i’r dyfodol a sut byddai hynny yn dylanwadau ar yr economi leol, gan gadw mewn ystyriaeth bod y Cyngor yn arwain drwy argyfwng ariannol ar hyn o bryd.

Adroddwyd bod ffioedd a thaliadau ar gyfer y flwyddyn 2024/25 wedi cael eu cymeradwyo ers mis Rhagfyr 2023. Ymhelaethwyd bod contractau bellach wedi mynd allan i gwsmeriaid gan ddefnyddio system electronig newydd. Sicrhawyd bod tri chwarter y cwsmeriaid wedi diweddaru eu cytundebau hyd yma. Gwelwyd nad oes llawer o gwsmeriaid yn diddymu eu contractau hyd yma o gymharu â’r flwyddyn ddiwethaf ble be u 10% o gwsmeriaid ganslo eu cytundeb. Nodwyd bod y cynnydd i ffioedd ar gyfer y flwyddyn yn unol â chwyddiant

Darparwyd diweddariad ar faterion staffio a chydymdeimlwyd gydag Arweinydd Tîm yr harbwr sydd wedi derbyn triniaeth ar gyfer cyflwr meddygol yn ddiweddar. Diweddarwyd ei fod wedi dychwelyd i’r gwaith a'i fod yn parhau i wella a derbyn triniaeth. Rhannwyd dymuniadau da iddo am wellhad buan. Cadarnhawyd hefyd bod Is-reolwr/Harbwrfeistr yr harbwr wedi cychwyn cyfnod ymddeoliad hyblyg. Nodwyd y golyga hyn ei fod yn parhau i weithio am dri diwrnod yr wythnos er mwyn parhau i gynorthwyo a chefnogi’r tîm. Atgoffwyd yr Aelodau ei fod wedi bod yn gweithio gyda’r harbwr ers amser maith ac yn meddu ar lawer o wybodaeth am yr harbwr. Diolchwyd iddo am barhau i weithio yn ystod cyfnod gwaeledd yr Arweinydd Tîm.

Diolchwyd i bawb a fu’n rhan o’r ymgynghoriad diweddar ar y Cynllun Strategol. Diweddarwyd bod yr ymgynghorwyr yn hapus gyda’r nifer o ymatebion a dderbyniwyd ym Mhlas Heli, y Cyngor Tref, ac yn electronig. Eglurwyd bod yr ymgynghoriad bellach wedi dod i ben ac mae drafft gorffenedig o’r cynllun wedi cael ei ddatblygu er mwyn ystyried y camau nesaf. Pwysleisiwyd bod pedair prif amcan wedi cael eu nodi yn y cynllun gan gynnwys:

1.     Carthu

2.     Isadeiledd Morwrol (Pontoons) - Eglurwyd bod arolwg o’r Pontoons eisoes wedi cael ei gwblhau er mwyn datrys problemau’r Pontoons i ddatblygu’r ardal ymhellach.

3.     Buddsoddiad Hir-dymor – Cadarnhawyd bod swyddogion yn edrych ar buddsoddiadau addas ar hyn o bryd. Ymhelaethwyd bod swyddogion wedi gosod Bid mewn i’r Gronfa Rheoli Asedau. Nodwyd hefyd bod swyddogion wedi gwneud cais i’r Cyngor ail-ystyried ble mae elw’r harbwr yn cael ei leoli, gan ymdrechu i sicrhau bod cyfran o elw’r harbwr yn cael ei glustnodi ar gyfer gwelliannau.

4.     Penderfyniadau cydlynol - Nodwyd bod yr amcan hwn yn ystyried sut mae’r harbwr yn ymgorffi i’r Cynllun Canol Tref a Phartneriaeth Natur Gwynedd a nifer o gynlluniau gwahanol all yr harbwr gyfrannu ac elwa ohonynt.

Sicrhawyd bydd y cynllun yn cael ei ddefnyddio’n barhaus er mwyn gwireddu’r amcanion hyn ac i ddatblygu’r harbwr i’r dyfodol.

Cydnabuwyd bod gorsaf Bad Achub Pwllheli wedi profi cyfnod heriol yn y misoedd diwethaf gan orfodi’r orsaf i gau am gyfnod byr. Cadarnhawyd bod yr orsaf wedi ail-agor ers 15 Chwefror a bod hyfforddiant wedi ail-gychwyn yno. Gobeithiwyd bydd yr orsaf yn gallu bod yn weithredol ac ateb galwadau erbyn y Pasg, yn ddibynnol ar ddatblygiad yr hyfforddiant a niferoedd yr unigolion sydd yn rhan o’r criw. Nodwyd mai prif nod yr orsaf ar hyn o bryd yw derbyn y prif bad achub yn ei ôl. Cadarnhawyd bod materion recriwtio dros yr wythnosau diwethaf wedi bod yn gadarnhaol iawn a diolchwyd i’r gymuned am eu hymateb ffafriol. Ymhelaethwyd bod 13 o unigolion wedi rhoi eu henwau ymlaen i wirfoddoli a diolchwyd iddynt am eu hamser a’u cefnogaeth.

Nodwyd y disgwylir i bencampwriaethau hwylio Plas Heli fod yn brysur iawn dros yr haf gan fod nifer fawr o enwau wedi eu derbyn i gymryd rhan. Nodwyd hefyd bod nifer o welliannau wedi cael ei wneud i’r safle gan gynnwys tar ar rhan o’r ffordd i lawr i’r traeth a rhannwyd gobaith o osod mwy o gawodydd er budd defnyddwyr. Tynnwyd sylw bod nifer o ddiffygion yn yr adeilad sydd heb dderbyn sylw gan swyddogion. Ymhelaethwyd bod maint fesurwr wedi bod ar y safle a gobeithir bydd yr adroddiad hwn yn cyrraedd yn fuan er mwyn datrys diffygion.

Diolchwyd i bawb am eu gwaith dros y gaeaf a'u hymroddiad i’r harbwr a’r hafan.