Agenda item

Cais cynllunio llawn ar gyfer 17 annedd fforddiadwy, ynghyd a chreu mynediad newydd i gerbydau a ffordd fynedfa fewnol, cau 2 bwynt mynediad amaethyddol presennol, creu mynediad newydd i wasanaethu is-orsaf newydd, gwaith ymestyn Ffordd Glanffynnon ynghyd a gwaith tirlunio, draenio a gwaith arall cysylltiedig.

 

AELOD LLEOL: Cynghorydd Beca Brown

 

Dolen i'r dogfennau cefndir perthnasol

PENDERFYNIAD: Caniatáu gydag amodau ac yn ddarostynedig i gytundeb 106 neu gytundeb unochrog ar gyfer sicrhau cyfraniad llecynnau agored

 

1.       Amser

2.       Unol a’r cynlluniau

3.       Deunyddiau

4.       Amod tai fforddiadwy

5.       Amodau priffyrdd

6.       Amodau bioamrywiaeth

7.       Amod tirlunio

9.       Tynnu hawliau dirprwyedig a ganiateir yn  ymwneud ag ymestyn a defnydd

10.     Materion draenio

11.     Cynllun Rheoli Adeiladu

12.     Gwarchod llwybr cyhoeddus

13.     Amodau Archeolegol

14.      Amodau Gwarchod y Cyhoedd a SPEnergy Networks

 

Nodiadau:

Priffyrdd

Trwydded Ystlumod

Cyfoeth Naturiol Cymru

Dwr Cymru

Llwybrau

SUDS

Datblygiad Mawr

Uned Draenio Tir

 

Cais cynllunio llawn ar gyfer 17 annedd fforddiadwy, ynghyd a chreu mynediad newydd i gerbydau a ffordd fynedfa fewnol, cau 2 bwynt mynediad amaethyddol presennol, creu mynediad newydd i wasanaethu is-orsaf newydd, gwaith ymestyn Ffordd Glanffynnon ynghyd a gwaith tirlunio, draenio a gwaith arall cysylltiedig.

 

Tynnwyd sylw at y Ffurflen Sylwadau Hwyr

 

Roedd rhai o’r aelodau wedi ymweld â’r safle 25-03-26

 

a)           Amlygodd y Rheolwr Cynllunio bod y cais llawn yn cynnwys, 5 tŷ deulawr 2 ystafell wely, 4 byngalo 2 ystafell wely, 6 tŷ deulawr 3 ystafell wely, 1 byngalo 4 ystafell wely ac 1 tŷ deulawr 5 ystafell wely. Byddai bwriad o ddarparu 100% o dai fforddiadwy gyda chymysgedd o ddeiliadaethau rhent cymdeithasol a chanolradd. Lleoli’r y safle y tu allan, ond yn ffinio gyda ffin datblygu Llanrug gydag anheddau preswyl presennol i'r De, Ffordd Glanffynnon i'r Gorllewin, cae amaethyddol a thir gwag wedi gordyfu i'r Dwyrain a thai preswyl i'r Gogledd. Bydd bwriad cadw hawddfraint 3 medr o led rhwng y datblygiad a chwrs dŵr sy’n rhedeg ar hyd terfyn dwyreiniol y safle, creu coridor ecolegol yng nghornel de ddwyreiniol y safle a datblygu basn cadw dŵr yng nghornel gogleddol a deheuol y safle. Bydd y llwybr cyhoeddus sy’n rhedeg drwy’r safle yn cael ei warchod.

 

Cyfeiriwyd at sylwadau hwyr a dderbyniwyd gan y Cyngor Cymuned, oedd yn cefnogi’r cais, yn ogystal â sylwadau a chadarnhad gan Gwasanaeth Gwarchod y Cyhoedd yn mynegi nad oedd ganddynt wrthwynebiad, yn ddarostyngedig i osod amodau i warchod mwynderau trigolion y tai gerbron a’r rhai o fewn y datblygiad. Ategwyd bod SP Energy Networks wedi cadarnhau’r angen i drafod ail-osod  gwifrau a bod hyn i’w osod fel amod cynllunio.

 

Gyda’r safle wedi ei leoli y tu allan i’r ffin ddatblygu, atgoffwyd yr Aelodau bod disgwyl i’r holl unedau fod ar gyfer angen fforddiadwy lleol. Ar gyfer Llanrug, diffinnir hyn fel pobl mewn angen tŷ fforddiadwy sydd wedi byw o fewn y Pentref neu yn yr ardal wledig o gwmpas am 5 mlynedd neu fwy yn olynol, un ai yn union cyn cyflwyno cais neu yn y gorffennol. Diffinnir yr ardal wledig yn yr achos yma fel pellter o 6km o safle'r cais a holl ardal unrhyw Gyngor Cymuned sy'n cael ei rhannu gan y pellter 6km, gan eithrio eiddo o fewn ffin datblygu unrhyw anheddiad oni bai am yr anheddiad hwnnw lle mae’r cais wedi’i leoli.

 

Cyflwynwyd tystiolaeth ar ffurf Datganiad Tai Fforddiadwy a Thystiolaeth o’r Angen a Strategaeth Gosod yn cyfeirio at yr angen oedd wedi ei amlygu ar Gofrestr Tai Cymdeithasol a Thai Teg yn Llanrug a Chwm y Glo. Amlygwyd bod Cwm y Glo yn bentref gyda ffin sydd wedi ei leoli o fewn 6km i Lanrug, gyda chadarnhad nad oedd cyfle ar gyfer datblygu tai ar gyfer cyfarch ei angen ei hun.

 

Cadarnhawyd bod yr angen cyfunol o’r Gofrestr Tai Cymdeithasol a Thai Teg gyda chysylltiad 5 mlynedd ar gyfer Llanrug yn 42, a  bod yr angen cyfunol ar gyfer Cwm y Glo yn 10 (er nodi y gall y ffigwr ar gyfer Cwm y Glo gynnwys dyblygu o’r rhestr ar gyfer Llanrug). Eglurwyd bod y wybodaeth yn dangos sut bydd y datblygiad yn darparu ar gyfer teuluoedd sydd eisoes yn byw yn Llanrug, ond mewn tai sydd o faint anaddas. Ar sail y wybodaeth a gyflwynwyd fel rhan o’r cais,  ystyriwyd bod yr angen wedi ei gadarnhau ar gyfer y datblygiad, a’r bwriad yn ffurfio estyniad rhesymegol i’r pentref.

 

Yng nghyd-destun mwynderau gweledol, lleolir y safle ar gyrion y pentref a ni ystyriwyd y byddai’n cael effaith weledol sylweddol ar y dirwedd, ac y byddai yn cydweddu cyd-destun adeiledig yr ardal bresennol a gweddill y pentref. Yn yr un modd, yng nghyd-destun mwynderau cyffredinol a phreswyl, ni ystyriwyd bod y bwriad yn debygol o gael effaith andwyol sylweddol ar drigolion cyfagos.

 

Cyfeiriwyd at ohebiaeth helaeth a dderbyniwyd gan drigolion lleol yn codi pryderon ynglŷn ag effaith y bwriad ar ddiogelwch ffyrdd.  O ganlyniad, derbyniwyd gwybodaeth bellach ar ffurf Archwiliad Diogelwch Ffyrdd gan yr ymgeisydd, ynghyd â chynllun oedd yn dangos gwelliannau megis lledu’r troad i’r de o’r safle. Adroddwyd bod yr Uned Drafnidiaeth yn fodlon gyda’r gwelliannau a gynigwyd ynghyd a manylion materion technegol fyddai yn destun cytundeb s278 sydd ar wahân i’r caniatâd cynllunio. Er cydnabod y gwrthwynebiadau a dderbyniwyd ynglŷn â diogelwch ffyrdd a cherddwyr, parcio a chynnydd mewn traffig, ystyriwyd fod y bwriad yn dderbyniol ac yn cydymffurfio â gofynion polisïau PS4, TRA 2 a 4 o’r CDLl.

 

Yng nghyd-destun materion Bioamrywiaeth, nodwyd bod yr Uned Bioamrywiaeth yn fodlon gyda’r bwriad, yn ddarostyngedig i ddilyn y cynllun tirweddu, y mesurau lliniaru a’r gwelliannau oedd wedi eu cynnwys yn yr arolygon a gyflwynwyd fel rhan o’r cais.

 

Yng nghyd-destun mannau agored, eglurwyd oherwydd maint y safle, bydd disgwyl i’r bwriad gynnig darpariaeth addas o fannau agored. Er nad oedd darpariaeth wedi ei gynnig ar y safle, bod cyfyngiadau’r safle, (ardaloedd agored anffurfiol megis llwybr cyhoeddus a chwrs dwr presennol, darparu coridor ecolegol a darpariaeth SUDS), yn golygu nad oedd yn bosib darparu man chwarae agored a chyfarpar o fewn y safle. O ganlyniad, ac ar sail yr angen oedd wedi ei gyfrifo, bydd cyfanswm cyfraniad oddeutu £10,000 ar gyfer darparu man chwarae gyda chyfarpar i’w sicrhau drwy gytundeb 106 neu unochrog.

 

Wedi ystyried yr holl ystyriaethau Cynllunio ystyriwyd fod y cynnig fel a gyflwynwyd yn dderbyniol ac yn bodloni gofynion polisïau perthnasol. Roedd y Swyddogion yn argymell caniatáu’r cais gydag amodau.

 

b)           Yn manteisio ar yr hawl i siarad, nododd yr ymgeisydd y sylwadau canlynol:

·        Bod bwriad adeiladu 17 o gartrefi fforddiadwy

·        Y datblygiad yn gyfle gwych i ddarparu cartrefi o ansawdd i ddiwallu’r gwir angen lleol a chyfrannu at ddyfodol cynaliadwy'r gymuned argyfwng tai

·        Bydd 11 cartref ar rent cymdeithasol a 6 ar rent canolraddol i ddiwallu’r angen lleol

·         Os bydd y cais yn cael ei gymeradwyo, bydd Adra yn mabwysiadu Polisi Gosod Lleol fydd yn sicrhau mai trigolion sydd mewn angen tai, sydd gyda chysylltiad o bum blynedd neu fwy gyda’r Cyngor Cymuned fydd yn gymwys am y cartrefi

·         Bod dros 400 wedi mynegi diddordeb i fyw yn Llanrug, gyda lleiafswm o 42 yn gymwys i’r datblygiad heb ddyblygiadau - gydag angen tai profedig a chysylltiad o dros 5 mlynedd i’r Cyngor Cymuned

·         Cyfle gwirioneddol i drawsnewid bywyd 17 o aelwydydd lleol 

·         Yn gynllun sy’n cynnig cartrefi diogel, modern, ynni effeithlon a rhoi cyfle i deuluoedd lleol gael sefydlogrwydd hir dymor

·         Bod proses ymgynghori wedi ei chynnal lle cafwyd noson agored lwyddiannus gyda’r gymuned leol, lle derbyniwyd 50 o enwau trigolion ar y noson

·         Y cais yn cydymffurfio gyda pholisïau lleol a chenedlaethol

·         Bod yr Uned Drafnidiaeth yn hapus gyda’r cais a’r asesiad diogelwch a gyflwynwyd

·         Bod Adra wedi ymateb i’r pryderon lleol drwy ymrwymo i ledu’r ffordd o flaen y safle a’i gwneud yn fwy diogel a chynaliadwy

·         Bydd llwybr troed addas yn cael ei wneud i gysylltu’r datblygiad gyda gweddill y pentref, a bod parodrwydd i gydweithio gyda’r Adran Priffyrdd i sicrhau mesurau i oleuo’r llwybr

·         Y safle yn gynaliadwy, yn addas ac yn cyd-fynd â strategaethau

·         Trwy fabwysiadu Polisi Gosod Lleol a fydd yn blaenoriaethu aelwydydd lleol, bydd y cartrefi yn debygol o gael eu gosod i aelwyd Gymraeg, ac o brofiad datblygiadau blaenorol a thystiolaeth glir, nodwyd bod 89% yn gallu’r Gymraeg mewn datblygiad ym Mhwllheli, 94% yn Dinas a 94% ym Methel - rhain yn ganlyniadau positif iawn

·         Yn gyfle i ddarparu cartrefi fforddiadwy o ansawdd uchel i bobl leol ac ymateb i’r angen lleol sydd wedi ei dystiolaethu yn glir

·          Yn annog y Pwyllgor i gefnogi’r cais er lles 17 teulu lleol.

 

c)           Yn manteisio ar yr hawl i siarad, nododd yr Aelod Lleol y sylwadau canlynol;

·          Dylai cael byw mewn cartref diogel, cynnes ac addas fod yn hawl dynol, sylfaenol i bawb, ond bod llawer gormod yn y Sir ac yn ardal  Llanrug dal heb dŷ - rhai wedi bod yn aros yn llawer rhy hir ar restr aros tai

·          Bod nifer o resymau dros fethu cael tŷ, a bod heb dŷ neu heb dŷ addas yn rhoi straen ar bobl - bod clywed straeon yn gallu bod yn dorcalonnus iawn

·          Dim dwywaith bod galw am dai yn Llanrug a bod ymdeimlad o fwrlwm yn y noson agored wedi amlygu hynny

·          Pryderon wedi ei mynegi am draffig, cornel dynn ger y safle, colled posib o fioamrywiaeth a phwysau chapasiti traeaniad yn yr ardal yma o’r pentref. Er hynny, yn croesawu ymrwymiad i ledu’r ffordd a gosod llwybr troed diogel i’r ysgol a bod gwybodaeth ychwanegol wedi ei rannu mewn ymateb i ymholiadau am fanylion wedi tawelu’r pryderon

·          Yng nghyd-destun Iaith - teg dweud mai Llanrug ydy pentref mwyaf Cymraeg y Byd a’r dymuniad yw i Lanrug gadw gafael ar y teitl er yn dymuno i bentrefi eraill eu herio fel bod y Gymraeg yn cryfhau ymhob man

·          Hysbys bellach bod stadau tai newydd mewn ardaloedd o gwmpas tref Caernarfon yn aml yn fwy Cymreig eu hiaith na’r cymunedau maent yn rhan ohono

·          Yn clywed llawer am yr hawl i fyw adre, ac un ffordd o gadw’r Cymreictod, fel yn Llanrug, yw creu amodau sy’n caniatáu i bobl ifanc yr ardal aros yn eu cymunedau neu ddychwelyd iddynt wedi cyfnod i ffwrdd

·          Yn deall anghysur pobl o weld eu pentrefi yn newid a thyfu wrth i fwy o dai gael eu codi

·          Ei bod yn cefnogi sylwadau Cyngor Cymuned Llanrug sy’n nodi  byddai angen lliniaru sgil effaith negyddol bosib o gael y tai

·          Fel y Cyngor Cymuned, yn gefnogol i’r cynllun, ac yn falch o gael meddwl am y bobl leol fydd yn cael tŷ addas, cynnes a diogel ar ôl aros am rywbeth mae cymaint yn gymryd yn ganiataol

 

ch)    Cynigiwyd ac eiliwyd caniatáu y cais

 

PENDERFYNWYD: Caniatáu gydag amodau ac yn ddarostyngedig i gytundeb 106 neu gytundeb unochrog ar gyfer sicrhau cyfraniad llecynnau agored

 

1.            Amser

2.            Unol a’r cynlluniau

3.            Deunyddiau

4.            Amod tai fforddiadwy

5.            Amodau priffyrdd

6.            Amodau bioamrywiaeth

7.            Amod tirlunio

9.            Tynnu hawliau dirprwyedig a ganiateir yn ymwneud ag ymestyn a defnydd

10.          Materion draenio

11.          Cynllun Rheoli Adeiladu

12.         Gwarchod llwybr cyhoeddus

13.          Amodau Archeolegol

14.         Amodau Gwarchod y Cyhoedd a SPEnergy Networks

 

Nodiadau:

Priffyrdd

Trwydded Ystlumod

Cyfoeth Naturiol Cymru

Dwr Cymru

Llwybrau

SUDS

Datblygiad Mawr

Uned Draenio Tir