Agenda item

Cynnig i dynnu'r wal derfyn bresennol er mwyn darparu mynediad  gwell i Gob Crwn,     a chreu llwybr troed newydd ar gyfer cerddwyr a beicwyr. 

 

AELOD LLEOL: Cynghorydd Nia Jeffreys

 

Dolen i'r dogfennau cefndir perthnasol

 

PENDERFYNIAD: Caniatáu gydag amodau -

 

1.         5 mlynedd

2.         Cwblhau’r bwriad yn unol â’r Cynlluniau

3.         Cwblhau’r bwriad yn unol â’r mesurau lliniaru ac osgoi rhesymol, a mesurau osgoi llygredd a gynhwysir o fewn yr Asesiad Amgylcheddol Cychwynnol a’r mesurau diogelu coed a gynhwysir o fewn yr Arolwg Cynllunio Coed.

4.         Amod gwelliannau Bioamrywiaeth

 

Cynnig i dynnu'r wal derfyn presennol er mwyn darparu mynediad  gwell i Gob Crwn,  a chreu llwybr troed newydd ar gyfer cerddwyr a beicwyr

 

         Tynnwyd sylw at y Ffurflen Sylwadau Hwyr

        

a)           Amlygodd y Swyddog Cynllunio nad oedd y llwybr presennol (un anffurfiol ac yn cynnwys ardal o laswellt ac wyneb anwastad) yn cydymffurfio â safonau Teithio Llesol a Safonau Hygyrchedd Cyfoes. Byddai’r gwelliant yn disodli rhannau o arwyneb glaswelltog presennol gyda llwybr cadarn, gwastad a hygyrch.

 

Adroddwyd bod y safle ar bwys maes parcio Llyn Bach mewn ardal a ddynodwyd ym Mharth 3 Llifogydd o dan bolisi TAN 15, tu allan i ffin datblygu y CDLl ac o fewn dynodiad Ardal o Ddiddordeb Hanesyddol Eithriadol. Cafwyd cadarnhad gan yr Uned Draenio Tir bod elfen o’r cais sydd yn ymwneud â’r system ddraenio gynaliadwy wedi ei gymeradwyo. Cyfeiriwyd at sylwadau gan yr Uned Bioamrywiaeth oedd yn datgan nad oedd gwelliannau bioamrywiaeth wedi eu cynnwys fel rhan or cais, ond byddai modd gosod amodau.

 

Ystyriwyd mai Polisi ISA 2: Cyfleusterau Cymunedol oedd prif ystyriaeth  y cais yma, sydd yn nodi pwysigrwydd cyfleusterau hamdden a chymunedol lleol i anghenion iechyd, cymdeithasol, addysgol, ieithyddol a diwylliannol ardal y Cynllun, yn ogystal â’i les economaidd.  Nodwyd mai cynllun am lwybr cyhoeddus gyda llecynnau eistedd efo byrddau picnic i fwynhau'r awyr agored oedd y bwriad gyda mynediad posib i bawb. Ystyriwyd bod y bwriad a'r lleoliad arfaethedig yn briodol i'r safle ac yn hygyrch i’r gymuned leol; y bwriad yn cwbl dderbyniol ar sail gofynion polisi ISA 2 CDLl

 

Yng nghyd-destun mwynderau gweledol, ni ystyriwyd y byddai’r bwriad yn amharu’n sylweddol fwy na’r hyn sydd mewn bodolaeth yn bresennol ar fwynderau gweledol yr ardal. Tynnwyd sylw at wrthwynebiad oedd wedi ei dderbyn ar sail colli defnydd hamddena y safle, ond ni ystyriwyd y byddai’r llwybr yn cael effaith andwyol sylweddol ar ddefnyddwyr presennol y safle o ran hynny; y bwriad yn dderbyniol o ran Polisi PCYFF 2 a PCYFF 3.

 

Gyda mynediad at y safle ar ffurf llwybr troed a’i leoliad yn hwylus o dref Porthmadog byddai hyn yn ei wneud yn hygyrch o ran gallu cyrraedd ato trwy lwybrau a ffyrdd presennol yn ogystal â thrwy ddefnydd trafnidiaeth gyhoeddus (arosfan bysiau parhaol gerllaw) yn ogystal â maes parcio o faint safonol ar gychwyn y llwybr. Ni ystyriwyd y byddai’r bwriad yn debygol o achosi perygl na ellid ei reoli ac felly yn dderbyniol ar sail gofynion perthnasol polisi PS 4.

 

Cyfeiriwyd at y ffaith bod y safle wedi ei leoli oddeutu 220m i ffwrdd o Ardal Cadwraeth Arbennig (ACA) Pen Llyn a’r Sarnau ac ar sail y mesurau osgoi rhesymol sy’n ymwneud â dyfrgwn, ynghyd â mesurau osgoi llygredd yn ystod y cyfnod gweithio, ni ystyriwyd y byddai’r bwriad yn debygol o gael effaith sylweddol ar yr ACA ac felly yn dderbyniol o ran gofynion Rheoliadau Cynefinoedd a pholisi PS19.

 

Saif hefyd o fewn Parth Llifogi 3 (Afonydd a Môr) ynghyd a Pharthau wedi eu gwarchod. Fel rhan o’r cais, cyflwynwyd Asesiad Canlyniad Llifogydd oedd yn nodi, gyda’r llwybr wedi ei godi yn uwch na’r tir presennol, byddai yn gweithredu fel haen ychwanegol i amddiffyn rhag llifogydd. Ni dderbyniwyd ymateb gan CNC, ond disgwylir y byddai’r bwriad yn cydymffurfio gyda gofynion rhan 11 o’r Nodyn Cyngor Technegol.

 

Nid oedd gan y Gwasanaeth Priffyrdd wrthwynebiad i’r bwriad a derbyniwyd sylwadau a chyngor cyffredinol gan Dwr Cymru.

 

Yng nghyd-destun materion ieithyddol, gyda’r bwriad yn darparu cyfleuster ar gyfer y gymuned leol ac yn golygu bydd mwy o bobl yn gallu mwynhau’r ardal,  ni ystyriwyd  y byddai’n debygol o gael effaith andwyol ar yr Iaith ac felly’n cydymffurfio gyda Polisi PS1.

 

Gyda’r bwriad yn cydymffurfio gyda polisïau Cynllunio perthnasol, roedd y Swyddogion yn argymell caniatáu’r cais gydag amodau.

 

b)             Yn manteisio ar yr hawl i siarad, nododd Aelod Ward Gyffiniol ar ran yr Aelod Lleol y sylwadau canlynol;

·        Bod Cob Crwn yn rhan o fywyd pob dydd trigolion Porthmadog

·        Y llwybr troed yn cael llawer o ddefnydd – cerddwyr, beicwyr a gwylwyr adar

·        Y cynllun yn un da – yn llesol i’r meddwl ac i’r corff

·        Nad oedd angen cau y llwybr presennol

·        Yn croesawu’r gwariant

·        Yn gefnogol i’r cais

 

c)           Cynigiwyd ac eiliwyd caniatáu y cais

 

         PENDERFYNWYD: Caniatáu gydag amodau -

 

1.         5 mlynedd

2.         Cwblhau’r bwriad yn unol â’r Cynlluniau

3.         Cwblhau’r bwriad yn unol â’r mesurau lliniaru ac osgoi rhesymol, a mesurau osgoi llygredd a gynhwysir o fewn yr Asesiad Amgylcheddol Cychwynnol a’r mesurau diogelu coed a gynhwysir o fewn yr Arolwg Cynllunio Coed.

4.         Amod gwelliannau Bioamrywiaeth