Agenda item

Gweithrediad dros dro o fast meteorolegol a strwythurau ategol am gyfnod o hyd at bum mlynedd

 

AELOD LLEOL: Cynghorydd Elwyn Edwards

 

Dolen i'r dogfennau cefndir perthnasol

PENDERFYNIAD: Caniatáu

Dirprwyo’r hawl i’r Uwch Reolwr Cynllunio i ganiatáu’r cais yn ddarostyngedig i’r amodau isod;

Amodau

1. Rhaid i’r datblygiad ddechrau o fewn pum mlynedd i ddyddiad y penderfyniad hwn.
2. Rhaid i’r datblygiad gael ei gyflawni yn unol â’r cynlluniau a’r dogfennau cymeradwy a ganlyn.
3. Rhaid tynnu’r mast a ganiateir drwy hyn a rhaid adfer y tir i’w gyflwr blaenorol o fewn 5 mlynedd i ddyddiad ei gomisiynu. Rhaid i’r ymgeisydd hysbysu’r Awdurdod Cynllunio Lleol o ddyddiad y comisiynu o fewn 3 mis i’r dyddiad hwnnw.
4. Cyn dechrau’r datblygiad (gan gynnwys gwaith tir a chlirio llystyfiant), rhaid cyflwyno Datganiad Dull manwl sy’n disgrifio sut y caiff y safle ei ddychwelyd i’w gyflwr gwreiddiol i’r Awdurdod Cynllunio Lleol, a rhaid ei gymeradwyo’n ysgrifenedig. Rhaid cadw at a gweithredu’r mesurau a gymeradwywyd yn llawn.
5. Ni fydd unrhyw ddatblygiad, gan gynnwys clirio’r safle, yn dechrau nes bod Cynllun Rheoli Amgylcheddol Adeiladu (CEMP) wedi’i gyflwyno i’r Awdurdod Cynllunio Lleol a’i gymeradwyo’n ysgrifenedig ganddo.
6. Ni fydd unrhyw ddatblygiad na cham o’r datblygiad yn dechrau nes bod Cynllun Diogelu Adar sy’n Magu (BBPP) wedi’i gyflwyno i’r Awdurdod Cynllunio Lleol a’i gymeradwyo ganddo.
7. Ni chaniateir unrhyw ddatblygiad hyd nes y bydd cynllun gwella bioamrywiaeth wedi ei gyflwyno i'r awdurdod cynllunio lleol a'i gytuno'n ysgrifenedig ganddo. Bydd y datblygiad yn cael ei wneud yn unol â'r manylion a gymeradwywyd.
8. Ni chaniateir unrhyw glirio llystyfiant, gwaith tir na gweithgareddau adeiladu yn ystod tymor nythu adar (1 Mawrth i 31 Awst yn gynhwysol) oni bai bod hynny wedi’i gytuno’n ysgrifenedig ymlaen llaw gyda’r Awdurdod Cynllunio Lleol. Pan fo angen cynnal gwaith yn ystod y cyfnod hwn, rhaid cynnal arolwg o’r safle gan ecolegydd cymwys dim mwy na 48 awr cyn dechrau’r gwaith. Rhaid gweithredu unrhyw argymhellion a roddir yn llawn, ac os canfyddir nythod gweithredol, rhaid sefydlu parth gwarchod priodol a’i gynnal hyd nes i’r cywion ffoi.
9. Rhaid gosod dyfeisiau gwyro adar ar bob gwifren gynhaliol allanol y mast ar bellter nad yw’n fwy na 2 fetr ar hyd eu hyd gyfan cyn i’r mast ddod yn weithredol. Rhaid cadw a chynnal y dyfeisiau hyn drwy gyfnod bywyd y datblygiad. Rhaid disodli unrhyw ddyfeisiau sydd wedi’u difrodi, wedi’u symud neu wedi datgysylltu o fewn un mis i’w canfod.
10. Cyn dechrau adeiladu unrhyw fastiau meteorolegol, neu ddefnyddio unrhyw offer adeiladu neu strwythur(au) dros dro 50 metr neu fwy o uchder (uwchben lefel y ddaear), rhaid i’r datblygwr gyflwyno cynllun goleuo hedfan i’w gymeradwyo gan Gyngor Gwynedd ar y cyd â’r Weinyddiaeth Amddiffyn, gan nodi sut y bydd y datblygiad yn cael ei oleuo drwy gydol ei oes er mwyn cynnal gofynion diogelwch hedfan sifil a milwrol fel y penderfynir yn angenrheidiol gan y Weinyddiaeth Amddiffyn.

Dylai hyn gynnwys:

a) Manylion unrhyw offer adeiladu a strwythurau dros dro sydd â chyfanswm uchder o 50 metr neu fwy (uwchben lefel y ddaear) a fydd yn cael eu defnyddio yn ystod adeiladu’r mast meteorolegol, ynghyd â manylion unrhyw oleuadau rhybudd hedfan a fydd yn cael eu gosod arnynt; a

b) Lleoliad ac uchder pob mast meteorolegol o fewn y datblygiad, gan nodi’r rhai a fydd yn cael goleuadau rhybudd hedfan, lleoliad y goleuadau ar y mast, y math o oleuadau a fydd yn cael eu defnyddio, a manylebau perfformiad y goleuo.

Wedyn, rhaid i’r datblygwr osod y goleuadau fel y nodir yn y cynllun goleuo hedfan a gymeradwywyd, a bydd y goleuadau yn parhau’n weithredol drwy oes y datblygiad.

11. Rhaid i’r datblygwr hysbysu’r Weinyddiaeth Amddiffyn, o leiaf 14 diwrnod cyn dechrau’r gwaith, yn ysgrifenedig, o’r wybodaeth ganlynol:

a) dyddiad dechrau codi’r mast(iau) meteorolegol;

b) uchder mwyaf unrhyw offer adeiladu a ddefnyddir wrth godi’r mast;

c) dyddiad y daw unrhyw fast meteorolegol i ddefnydd;

d) lledred, hydred ac uchder uchaf pob mast meteorolegol.

     12. Rhaid hefyd hysbysu’r Weinyddiaeth Amddiffyn am unrhyw newidiadau i’r  wybodaeth hon ac ar ôl cwblhau’r gwaith adeiladu.

 

Gweithrediad dros dro o fast meteoroleg a strwythurau ategol am gyfnod o hyd at bum mlynedd.

 

Tynnwyd sylw at y ffurflen sylwadau hwyr oedd yn cynnwys sylwadau gan Cyfoeth Naturiol Cymru (CNC) yn cytuno gyda chasgliad yr Asesiad Rheoliadau Cynefinoedd.

 

a)     Amlygodd yr Uwch Swyddog Cynllunio - Mwynau a Gwastraff bod y cais yn ymwneud â chodi a gweithredu mast anemometreg dros dro am gyfnod o bum mlynedd ar ucheldir ger copa Pen y Bwlch Gwyn. Bydd y mast yn strwythur delltog dur hyd at 100m o uchder, wedi’i gynnal gan wifrau tynhau ac wedi’i gyfarparu ag offer monitro meteoroleg, gan gynnwys anemomedrau a cheiliogod gwynt. Nodwyd bod nifer o ddynodiadau tirwedd a chadwraeth bwysig yn gymharol agos - Parc Cenedlaethol Eryri, ffin arfaethedig Parc Cenedlaethol Glyndŵr ac AHNE Bryniau Clwyd a Dyffryn Dyfrdwy; y safle hefyd o fewn cyffiniau sawl safle Ewropeaidd dynodedig, megis ACA, AGA a safleoedd RAMSAR - Afon Dyfrdwy a Llyn Tegid, Migneint-Arenig-Dduallt a’r Berwyn.

 

Yng nghyd-destun egwyddor y bwriad, nodwyd nad oedd polisi penodol yn y CDLl yn ymwneud â mastiau meteoroleg. Fodd bynnag, pwrpas y mast arfaethedig oedd casglu data meteoroleg i asesu hyfywedd datblygiad ynni gwynt posibl yn y dyfodol, ac felly ystyriwyd y cynnig fel math o seilwaith cysylltiedig i ddatblygiad ynni adnewyddadwy yn erbyn Polisi Strategol PS 7 y CDLl; polisi sy’n cefnogi technolegau ynni adnewyddadwy, ynghyd â Polisi ADN 1 sy’n ymwneud â datblygiadau ynni gwynt ar y tir.

 

Adroddwyd, ers mabwysiadu’r CDLl, bod yr Ardaloedd Chwilio Strategol a nodwyd yn TAN 8 wedi cael eu disodli gan yr Ardaloedd a Aseswyd Ymlaen Llaw a nodir yn Cymru’r Dyfodol: Y Cynllun Cenedlaethol 2040. Cyfeiriwyd at Polisi 17 o Cymru’r Dyfodol sydd yn sefydlu rhagdybiaeth o blaid datblygiadau ynni gwynt ar raddfa fawr o fewn yr ardaloedd hynny, tra bod Polisi 18 yn darparu’r meini prawf perthnasol ar gyfer asesu cynigion o’r fath.

 

Ategwyd bod y safle dan sylw wedi’i leoli y tu allan i’r Ardal a Aseswyd Ymlaen Llaw agosaf ar gyfer ynni gwynt. Fodd bynnag, nid yw Cymru’r Dyfodol na Polisi Cynllunio Cymru yn gwahardd datblygiadau ynni gwynt neu seilwaith cysylltiedig y tu allan i’r ardaloedd hynny. Yn hytrach, mae’r Ardaloedd a Aseswyd Ymlaen Llaw yn nodi lle mae Llywodraeth Cymru wedi asesu y gellid derbyn datblygiadau gwynt ar raddfa fawr mewn egwyddor, heb rwystro ystyriaeth i gynigion mewn lleoliadau eraill.

 

Yn ychwanegol, mae Polisi Cynllunio Cymru yn nodi bod prosiectau cynhyrchu ynni ar y tir â chapasiti rhwng 10MW a 350MW yn cael eu penderfynu gan Weinidogion Cymru drwy’r broses Datblygiadau o Arwyddocâd Cenedlaethol (DAC/DNS) ac yn cael eu hasesu yn erbyn polisïau Cymru’r Dyfodol. Yn hyn o beth, nodwyd bod hysbysiad o fwriad wedi’i gyflwyno i Weinidogion Cymru ar gyfer fferm wynt bosibl ar yr un safle. Serch hynny, nid yw’r cais presennol yn ymwneud â’r fferm wynt ei hun ac ni ellid rhoi pwysau i egwyddor y datblygiad hwnnw wrth asesu’r cais. Rhaid ystyried y mast anemometreg ar ei rinweddau ei hun.

 

Pwysleisiwyd bod y cynnig yn ymwneud â strwythur dros dro am gyfnod o bum mlynedd yn unig. Bydd amodau cynllunio yn sicrhau bod y mast, y gwifrau tynhau a’r holl seilwaith cysylltiedig yn cael eu tynnu o’r safle a’r tir yn cael ei adfer i’w gyflwr blaenorol ar ddiwedd y cyfnod. O ganlyniad, ystyriwyd nad oedd y datblygiad yn debygol o arwain at effeithiau parhaol neu hirdymor ar y safle. Ystyriwyd hefyd bod yr egwyddor o osod mast anemometreg dros dro at ddibenion casglu data meteoroleg yn dderbyniol mewn polisi, yn amodol ar ystyriaeth fanwl o’r effeithiau perthnasol, gan gynnwys tirwedd, gwelededd, bioamrywiaeth, treftadaeth, mwynderau a materion technegol eraill.

 

Yng nghyd-destun materion gweledol, nodwyd bod polisïau PCYFF 3, AMG 2 ac AMG 3 y CDLl yn berthnasol wrth asesu effaith y datblygiad ar gymeriad y dirwedd a mwynderau gweledol. Bydd y safle wedi’i leoli ar dir uchel o fewn Ardal Tirwedd Arbennig ‘Cefnwlad y Bala’, ac mewn lleoliad sydd i’w weld o rannau o Barc Cenedlaethol Eryri. Cyflwynwyd Asesiad Tirwedd ac Effaith Weledol (LVA) i gefnogi’r cais, ynghyd â gwybodaeth ychwanegol ar bwyntiau golygfa. Yn dilyn adolygu’r wybodaeth, adroddwyd bod CNC yn fodlon bod digon o dystiolaeth wedi’i darparu i asesu’r effeithiau ar y dirwedd a’r mwynderau gweledol, ac yn casglu na fyddai’r datblygiad yn niweidio cymeriad y dirwedd, amwynder gweledol na rhinweddau arbennig Parc Cenedlaethol Eryri. Cydnabuwyd y byddai’r mast 100m o uchder yn weladwy dros ardal eang ac y bydd yn cyflwyno elfen o waith dynol mewn rhai golygfeydd agored. Fodd bynnag, roedd yr asesiad yn dangos mai effeithiau bach neu isel fyddai’n codi yn y mwyafrif o safbwyntiau, gyda rhai effeithiau cymedrol neu gymedrol-isel mewn nifer gyfyngedig o leoliadau sensitif; byddai adeiladwaith delltwaith main y mast, ynghyd â’i natur dros dro, yn lleihau ei effaith weledol gyffredinol.

 

O ystyried barn CNC, canfyddiadau’r Asesiad Tirwedd ac Effaith Weledol, a natur dros dro’r datblygiad, ystyriwyd na fyddai’r cynnig yn arwain at effeithiau annerbyniol ar y dirwedd na mwynderau gweledol ac y byddai’n cydymffurfio â gofynion polisïau PCYFF 3, AMG 2 ac AMG 3 y CDLl.

 

Yng nghyd-destun Mwynderau Preswyl ac o ystyried y pellter rhwng y safle a’r eiddo preswyl agosaf, ynghyd â natur gymharol syml y datblygiad, dyluniad cul y mast a dylanwad topograffi’r tir, ni ystyriwyd y byddai’n yn cael effaith annerbyniol ar amwynder gweledol na mwynderau preswyl cyffredinol. O ganlyniad, ystyriwyd bod y datblygiad yn cydymffurfio â gofynion Polisi PCYFF 2 y CDLl, sy’n ceisio sicrhau nad yw datblygiadau’n cael effaith andwyol sylweddol ar iechyd, diogelwch na mwynderau deiliaid eiddo cyfagos.

 

Mewn perthynas â goleuadau awyrennau arfaethedig, nodwyd mai goleuadau is-goch dwysedd isel fydd y goleuadau ac felly ni ystyriwyd y byddant yn cael effaith weledol sylweddol nac yn achosi llygredd goleuni annerbyniol i eiddo cyfagos.

 

Derbyniwyd sylwadau ynghylch posibilrwydd sŵn, ond gan fod y mast yn cynnwys ychydig iawn o rannau symudol, ni ddisgwylid iddo gynhyrchu sŵn gweithredol sylweddol. Yn ogystal, byddai unrhyw aflonyddwch dros dro yn ystod y cyfnod adeiladu yn gyfyngedig o ran ei hyd ac yn cael ei reoli drwy arferion adeiladu safonol. Ar y sail yma, ystyriwyd bod y cynnig yn dderbyniol o safbwynt mwynderau ac yn cydymffurfio â Polisi PCYFF 2.

 

Wrth ystyried Materion Trafnidiaeth nodwyd nad oedd y datblygiad arfaethedig yn cynnwys unrhyw newidiadau i’r trefniadau mynediad presennol ac ni ragwelwyd y byddai’n arwain at gynnydd sylweddol mewn symudiadau traffig yn ystod y cyfnod gweithredu. O ganlyniad, ni fyddai’r cynnig yn cael effaith andwyol ar ddiogelwch na gweithrediad y rhwydwaith ffyrdd lleol ac felly o safbwynt trafnidiaeth, yn cydymffurfio â gofynion Polisïau PS 4 a TRA 4 y CDLl.

 

Yng nghyd-destun Materion Ecolegol adroddwyd bod y safle wedi’i leoli yn gymharol agos at nifer o safleoedd Ewropeaidd dynodedig, gan gynnwys ACA Afon Dyfrdwy a Llyn Tegid, ACA/AGA Migneint–Arenig–Dduallt, safle RAMSAR Llyn Tegid ac ACA/AGA Berwyn. Roedd CNC yn nodi mai’r prif risgiau fyddai’n codi yn ystod y cyfnod adeiladu, yn enwedig mewn perthynas â llygredd, fydd gwaddodiad a tharfu ar gyrsiau dŵr. Fodd bynnag, ystyriwyd y gellid rheoli’r risgiau hyn drwy sicrhau amod Cynllun Rheoli Amgylcheddol Adeiladu (CEMP). Roedd CNC yn cadarnhau, yn ddarostyngedig i weithredu mesurau lliniaru priodol, na fyddai’r datblygiad yn cael effaith andwyol ar gyfanrwydd y safleoedd dynodedig. Ni ystyriwyd chwaith fod y datblygiad yn debygol o arwain at effeithiau sylweddol o ran maethynnau neu ansawdd dŵr yn ystod y cyfnod gweithredol.

 

O safbwynt ecolegol, er bod pryderon wedi’u codi ynghylch adar sy’n nythu, yn benodol y posibilrwydd y gallai’r mast weithredu fel man gorffwys i ysglyfaethwyr, ystyriwyd y gellid rheoli’r mater hwn drwy Gynllun Diogelu Adar sy’n Magu (BBPP). Roedd CNC ac Ecolegydd y Cyngor yn fodlon nad oedd y datblygiad yn debygol o gael effaith sylweddol ar rywogaethau gwarchodedig nac ar gynefinoedd sensitif, gyda cholled gynefin gyfyngedig iawn yn deillio o’r cynnig. Roedd yr Asesiad Rheoliadau Cynefinoedd wedi dod i’r casgliad y gellid rheoli’r prif risgiau i safleoedd Ewropeaidd, sy’n ymwneud yn bennaf â’r cyfnod adeiladu ac adar sy’n nythu, drwy amodau cynllunio priodol gan gynnwys Cynllun Rheoli Amgylcheddol Adeiladu (CEMP) a Chynllun Diogelu Adar sy’n Magu (BBPP). O ganlyniad, ystyriwyd na fyddai’r datblygiad yn cael effaith andwyol ar gyfanrwydd unrhyw safle Ewropeaidd, naill ai ar ei ben ei hun nac ar y cyd â chynlluniau neu brosiectau eraill. Yn ddarostyngedig i amodau priodol sy’n sicrhau gweithredu’r mesurau lliniaru a’r gwelliannau bioamrywiaeth arfaethedig, ystyriwyd bod y datblygiad yn dderbyniol ac yn cydymffurfio â Pholisïau PS 19, AMG 3, AMG 5 a GWA 1 y CDLl.

 

Nid oedd unrhyw ddynodiadau treftadaeth ger y safle a bu i CADW gadarnhau nad oedd ganddynt wrthwynebiad i’r datblygiad. Ystyriwyd na fyddai’r mast yn cael effaith ar asedau treftadaeth dynodedig gan fod topograffi’r tir yn cyfyngu ar y cysylltiad gweledol rhyngddo a’r asedau hynny; y cynnig yn cydymffurfio â gofynion Polisi PS 20 y CDLl.

 

Amlygwyd bod y safle wedi’i leoli o fewn ardal hyfforddi hedfan isel Low Flying Area 7. Cadarnhaodd y Weinyddiaeth Amddiffyn nad oedd ganddynt wrthwynebiad i’r datblygiad, yn amodol ar osod amodau safonol sy’n ymwneud â goleuadau rhwystr i awyrennau, siartio hedfan a gofynion diogelwch perthnasol. Ystyriwyd bod yr amodau hyn yn angenrheidiol er mwyn sicrhau na fyddai’r mast yn effeithio’n andwyol ar ddiogelwch hedfan na gweithrediadau hedfan isel milwrol ac felly yn cydymffurfio â gofynion Polisi PCYFF 2 y CDLl.

 

Gan nad yw’r datblygiad yn cyrraedd y trothwy sy’n gofyn am Ddatganiad Iaith Gymraeg, ac oherwydd ei natur dros dro a chyfyngedig, ni ystyriwyd y byddai’n cael effaith andwyol ar yr iaith Gymraeg ac felly yn cydymffurfio â Polisi PS 1 y CDLl a’r CCA Cynnal a Chreu Cymunedau Nodedig a Chynaliadwy.

 

Ystyriwyd bod egwyddor y datblygiad yn dderbyniol fel seilwaith cysylltiedig i ynni adnewyddadwy ac na fyddai’n arwain at effeithiau hirdymor gan y bydd y mast yn cael ei dynnu, a’r safle’n cael ei adfer ar ddiwedd cyfnod 5 mlynedd. Ni ystyriwyd y byddai’n cael effaith annerbyniol ar y dirwedd, mwynderau, bioamrywiaeth, safleoedd Ewropeaidd dynodedig, treftadaeth, diogelwch hedfan, yn amodol ar osod amodau priodol; y datblygiad yn cydymffurfio â’r polisïau lleol a chenedlaethol perthnasol a’r argymhelliad yn un i ganiatáu yn ddarostyngedig i amodau.

 

b)     Nododd yr Aelod Lleol ei fod yn cytuno gyda’r argymhelliad

 

c)     Cynigiwyd ac eiliwyd caniatáu’r cais

 

d)     Yn ystod y drafodaeth ddilynol, nodwyd y sylwadau canlynol gan Aelodau:

·        Bod amodau digonol i sicrhau rheolaeth

·        Un mast sydd yma i gasglu data am gyflymder gwynt - be ddaw yn ei sgil? Fferm wynt a pheilonau hyll fydd yn ceisio cysylltu â’r grid cenedlaethol

 

PENDERFYNWYD: Dirprwyo’r hawl i’r Uwch Reolwr Cynllunio i ganiatáu’r cais yn ddarostyngedig i’r amodau isod;

 

1.     Rhaid i’r datblygiad ddechrau o fewn pum mlynedd i ddyddiad y penderfyniad

2.     Rhaid i’r datblygiad gael ei gyflawni yn unol â’r cynlluniau a’r dogfennau cymeradwy a ganlyn.

3.     Rhaid tynnu’r mast a ganiateir drwy hyn a rhaid adfer y tir i’w gyflwr blaenorol o fewn 5 mlynedd i ddyddiad ei gomisiynu. Rhaid i’r ymgeisydd hysbysu’r Awdurdod Cynllunio Lleol o ddyddiad y comisiynu o fewn 3 mis i’r dyddiad hwnnw.

4.     Cyn dechrau’r datblygiad (gan gynnwys gwaith tir a chlirio llystyfiant), rhaid cyflwyno Datganiad Dull manwl sy’n disgrifio sut y caiff y safle ei ddychwelyd i’w gyflwr gwreiddiol i’r Awdurdod Cynllunio Lleol, a rhaid ei gymeradwyo’n ysgrifenedig. Rhaid cadw at a gweithredu’r mesurau a gymeradwywyd yn llawn.

5.     Ni fydd unrhyw ddatblygiad, gan gynnwys clirio’r safle, yn dechrau nes bod Cynllun Rheoli Amgylcheddol Adeiladu (CEMP) wedi’i gyflwyno i’r Awdurdod Cynllunio Lleol a’i gymeradwyo’n ysgrifenedig ganddo.

6.     Ni fydd unrhyw ddatblygiad na cham o’r datblygiad yn dechrau nes bod Cynllun Diogelu Adar sy’n Magu (BBPP) wedi’i gyflwyno i’r Awdurdod Cynllunio Lleol a’i gymeradwyo ganddo.

7.     Ni chaniateir unrhyw ddatblygiad hyd nes y bydd cynllun gwella bioamrywiaeth wedi ei gyflwyno i'r awdurdod cynllunio lleol a'i gytuno'n ysgrifenedig ganddo. Bydd y datblygiad yn cael ei wneud yn unol â'r manylion a gymeradwywyd.

8.     Ni chaniateir unrhyw glirio llystyfiant, gwaith tir na gweithgareddau adeiladu yn ystod tymor nythu adar (1 Mawrth i 31 Awst yn gynhwysol) oni bai bod hynny wedi’i gytuno’n ysgrifenedig ymlaen llaw gyda’r Awdurdod Cynllunio Lleol. Pan fo angen cynnal gwaith yn ystod y cyfnod hwn, rhaid cynnal arolwg o’r safle gan ecolegydd cymwys dim mwy na 48 awr cyn dechrau’r gwaith. Rhaid gweithredu unrhyw argymhellion a roddir yn llawn, ac os canfyddir nythod gweithredol, rhaid sefydlu parth gwarchod priodol a’i gynnal hyd nes i’r cywion ffoi.

9.     Rhaid gosod dyfeisiau gwyro adar ar bob gwifren gynhaliol allanol y mast ar bellter nad yw’n fwy na 2 fetr ar hyd eu hyd gyfan cyn i’r mast ddod yn weithredol. Rhaid cadw a chynnal y dyfeisiau hyn drwy gyfnod bywyd y datblygiad. Rhaid disodli unrhyw ddyfeisiau sydd wedi’u difrodi, wedi’u symud neu wedi datgysylltu o fewn un mis i’w canfod.

10.  Cyn dechrau adeiladu unrhyw fastiau meteoroleg, neu ddefnyddio unrhyw offer adeiladu neu strwythur(au) dros dro 50 metr neu fwy o uchder (uwchben lefel y ddaear), rhaid i’r datblygwr gyflwyno cynllun goleuo hedfan i’w gymeradwyo gan Gyngor Gwynedd ar y cyd â’r Weinyddiaeth Amddiffyn, gan nodi sut y bydd y datblygiad yn cael ei oleuo drwy gydol ei oes er mwyn cynnal gofynion diogelwch hedfan sifil a milwrol fel y penderfynir yn angenrheidiol gan y Weinyddiaeth Amddiffyn.

Dylai hyn gynnwys:

a) Manylion unrhyw offer adeiladu a strwythurau dros dro sydd â chyfanswm uchder o 50 metr neu fwy (uwchben lefel y ddaear) a fydd yn cael eu defnyddio yn ystod adeiladu’r mast meteoroleg, ynghyd â manylion unrhyw oleuadau rhybudd hedfan a fydd yn cael eu gosod arnynt; a

b) Lleoliad ac uchder pob mast meteoroleg o fewn y datblygiad, gan nodi’r rhai a fydd yn cael goleuadau rhybudd hedfan, lleoliad y goleuadau ar y mast, y math o oleuadau a fydd yn cael eu defnyddio, a manylebau perfformiad y goleuo.

Wedyn, rhaid i’r datblygwr osod y goleuadau fel y nodir yn y cynllun goleuo hedfan a gymeradwywyd, a bydd y goleuadau yn parhau’n weithredol drwy oes y datblygiad.

11.  Rhaid i’r datblygwr hysbysu’r Weinyddiaeth Amddiffyn, o leiaf 14 diwrnod cyn dechrau’r gwaith, yn ysgrifenedig, o’r wybodaeth ganlynol:

a) dyddiad dechrau codi’r mast(iau) meteoroleg;

b) uchder mwyaf unrhyw offer adeiladu a ddefnyddir wrth godi’r mast;

c) dyddiad y daw unrhyw fast meteoroleg i ddefnydd;

d) lledred, hydred ac uchder uchaf pob mast meteoroleg.

12.  Rhaid hefyd hysbysu’r Weinyddiaeth Amddiffyn am unrhyw newidiadau i’r  wybodaeth hon ac ar ôl cwblhau’r gwaith adeiladu.