Rhaglen, penderfyniadau a chofnodion drafft

Cyflwyno adroddiad yr Aelod Cabinet Cyllid.

Derbyn yr adroddiad a chymeradwyo’r Strategaeth Gyfalaf ar gyfer 205/26.

Cyflwynodd yr Aelod Cabinet Cyllid, y Cynghorydd Huw Wyn Jones, adroddiad yn rhoi trosolwg lefel uchel ar y modd y mae gwariant cyfalaf, ariannu cyfalaf a gweithgaredd rheolaeth trysorlys yn cyfrannu at ddarparu gwasanaethau cyhoeddus lleol.  ‘Roedd yr adroddiad hefyd yn rhoi trosolwg o sut y rheolir risgiau cysylltiedig, a’r goblygiadau i gynaliadwyedd ariannol yn y dyfodol.

Wrth gyflwyno’r adroddiad, tynnwyd sylw gan yr Aelod Cabinet at baragraff 6.4 o Atodiad C i’r adroddiad ‘Ystyriaethau Amgylcheddol, Cymdeithasol a Llywodraethu (ESG)’ a ddiwygiwyd yn dilyn rhybudd o gynnig y Cynghorydd Cai Larsen i gyfarfod 3 Hydref, 2024 o’r Cyngor.  Nodwyd bod y Strategaeth yn cadarnhau bod y Cyngor yn ymrwymedig i fod yn fuddsoddwr cyfrifol gan ystyried holl ffactorau amgylcheddol, cymdeithasol a llywodraethu wrth fuddsoddi.

PENDERFYNWYD derbyn yr adroddiad a chymeradwyo’r Strategaeth Gyfalaf ar gyfer 205/26.

Cyflwyno adroddiad y Swyddog Monitro.

1. Sefydlu Cyd-bwyllgor Trosolwg a Chraffu Cyd bwyllgor Corfforedig y Gogledd gyda'r Cylch Gorchwyl sydd yn Atodiad 1 i’r adroddiad a gyflwynwyd i’r Cyngor.
2. Cytuno bod pwerau Pwyllgorau Craffu lleol y darperir ar eu cyfer o dan Reoliadau Cyd bwyllgorau Corfforedig (Cyffredinol) (Rhif 2) (Cymru) 2022 yn cael eu cadw.
3. Cytuno y bydd cydbwysedd gwleidyddol enwebeion Cyngor Gwynedd i'r pwyllgor trosolwg a chraffu ar y cyd (CBTcH) yn adlewyrchu aelodaeth Cyngor Gwynedd yn hytrach na chyfanswm aelodaeth holl gynghorau Gogledd Cymru.
4. Cytuno y bydd yr ysgrifenyddiaeth ar gyfer y Cyd bwyllgor Trosolwg a Chraffu yn cael ei ddarparu gan y CBC yn unol â'r Cylch Gorchwyl.

Cyflwynodd y Swyddog Monitro adroddiad:-

·         yn nodi bod canllawiau statudol ac arfer presennol yn arwain tuag at chwe chyngor y Gogledd yn sefydlu model craffu trosolwg ar y cyd fel bod un corff penodol sy’n cael ei drochi yng ngwaith y Cyd-bwyllgor Corfforedig (CBC);

·         yn cyflwyno cyfres o argymhellion sy’n darparu ar gyfer trefniadau craffu ar gyfer y Cyd-bwyllgor.

Rhoddwyd cyfle i’r aelodau ofyn cwestiynau a chyflwyno sylwadau.

Mynegwyd anfodlonrwydd bod penodi aelodau’r Cyd-bwyllgor ar sail cydbwysedd gwleidyddol y cynghorau unigol yn eithrio grwpiau llai ar draws y Gogledd rhag cyrraedd y trothwy.  Awgrymwyd hefyd y byddai Cyd-bwyllgor o 18 o aelodau (sef 3 aelod o bob cyngor, yn hytrach na 2 fel sy’n cael ei gynnig) yn rhoi gwell siawns i grwpiau llai gael sedd ar y Cyd-bwyllgor.  Mewn ymateb, nodwyd:-

·         Y byddai’r pryder hwn yn cael ei gyfleu.

·         Nad oedd y drws wedi cau ac y byddai’n bosib’ addasu neu ddatblygu’r model ymhellach ar ôl profiad o gynnal y trefniadau.

Mewn ymateb i gwestiynau gan aelodau, eglurwyd, petai argymhellion yr adroddiad yn cael eu mabwysiadu, mai’r Cyngor llawn, ym mis Mai, fyddai’n mabwysiadu dyraniad seddau'r Cyngor hwn ar y Cyd-bwyllgor fel rhan o’i adolygiad blynyddol o gydbwysedd gwleidyddol y Cyngor.  O edrych ar y rhifau a’r rhaniad gwleidyddol, a heb ragfarnu unrhyw benderfyniad, roedd yn ymddangos ar hyn o bryd y byddai yna 1 sedd i Grŵp Plaid Cymru ac 1 sedd i’r Grŵp Annibynnol.

Nododd yr Arweinydd, er yn cytuno â llawer o’r pwyntiau, nad oedd y drefn CBC, sy’n golygu rhanbartholi o Fôn i Wrecsam, yn ddull democrataidd o wneud penderfyniadau.  Fodd bynnag, gan fod y drefn wedi’i gorfodi arnom, roedd yn bwysig sicrhau dull o graffu gwaith y CBC a’i ddal yn atebol.

PENDERFYNWYD

1.         Sefydlu Cyd-bwyllgor Trosolwg a Chraffu Cyd bwyllgor Corfforedig y Gogledd gyda'r Cylch Gorchwyl sydd yn Atodiad 1 i’r adroddiad a gyflwynwyd i’r Cyngor.

2.         Cytuno bod pwerau Pwyllgorau Craffu lleol y darperir ar eu cyfer o dan Reoliadau Cyd bwyllgorau Corfforedig (Cyffredinol) (Rhif 2) (Cymru) 2022 yn cael eu cadw.

3.         Cytuno y bydd cydbwysedd gwleidyddol enwebeion Cyngor Gwynedd i'r pwyllgor trosolwg a chraffu ar y cyd (CBTcH) yn adlewyrchu aelodaeth Cyngor Gwynedd yn hytrach na chyfanswm aelodaeth holl gynghorau Gogledd Cymru.

4.         Cytuno y bydd yr ysgrifenyddiaeth ar gyfer y Cyd bwyllgor Trosolwg a Chraffu yn cael ei ddarparu gan y CBC yn unol â'r Cylch Gorchwyl.

Cyflwyno adroddiad yr Aelod Cabinet Gwasanaethau Corfforaethol a Chyfreithiol.

Cymeradwyo Cynigion Drafft dan adrannau 25 a 31 o Ddeddf Llywodraeth Leol (Democratiaeth)(Cymru) 2013 er mwyn ymgynghori arnynt.

Cyflwynodd yr Aelod Cabinet Gwasanaethau Corfforaethol a Chyfreithiol, y Cynghorydd Llio Elenid Owen, adroddiad:-

·         yn nodi y bu i’r Cyngor, ar 7 Mawrth, 2024, gymeradwyo cynnal arolygon cymunedol o dan adrannau 25 a 31 o Ddeddf Llywodraeth Leol (Democratiaeth) (Cymru) 2013.

·         yn adrodd yn ôl ar ganlyniad y cyfnod ymgynghori ac ymchwilio cychwynnol ar yr arolygon cymunedol hynny; ac

·         yn gofyn i’r Cyngor gymeradwyo Cynigion Drafft ar gyfer ymgynghoriad cyhoeddus pellach.

PENDERFYNWYD cymeradwyo’r Cynigion Drafft dan adrannau 25 a 31 o Ddeddf Llywodraeth Leol (Democratiaeth)(Cymru) 2013 er mwyn ymgynghori arnynt.

Cyflwyno adroddiad y Swyddog Monitro.

Derbyn yr adroddiad.

Cyflwynodd y Swyddog Monitro adroddiad yn adrodd yn ffurfiol, yn unol â Rhan 5 o’r Cyfansoddiad, bod Arweinydd y Cyngor wedi gweithredu i ail-drefnu Portffolios Aelodau’r Cabinet.

Gwnaed sylw gan aelod bod mwyafrif aelodau’r Cabinet yn dod o ardal Arfon, ac mai un yn unig sy’n hanu o Feirionnydd.  Nodwyd hefyd bod yr Aelodau Cabinet sy’n dod o Ddwyfor yn byw ar gyrion Arfon.  Gan hynny, holwyd sut y gellid sicrhau nad oes yna ragfarn ddiarwybod yn codi wrth wneud penderfyniadau ar sail daearyddiaeth, ac i ba raddau y gellid osgoi diffyg cydymdeimlad â chyrion y sir, sef y rhannau mwyaf gwasgarog eu poblogaeth?  Mewn ymateb, nododd y Prif Weithredwr:-

·         Nad oedd am basio barn ynglŷn â chynnwys y sylw gan mai adroddiad er gwybodaeth oedd gerbron o ran newid y Cyfansoddiad, a mater i’r Arweinydd oedd penodi ei Chabinet.

·         Fel yr un sy’n arwain staff y Cyngor, ei fod yn nodi’r sylw, ac y gallai sicrhau nad oes yna unrhyw ragfarn ddiarwybod ddaearyddol yn bodoli o safbwynt y staff.

Diolchodd aelod i’r 4 Aelod Cabinet oedd wedi sefyll i lawr yn gynharach yn y tymor hwn ar fater o egwyddor am eu gwasanaeth.  Nodwyd bod yr aelodau hynny wedi galw am ymchwiliad cyhoeddus ac adolygiad annibynnol ar y mater, ac y croesawid y ffaith bod hynny’n digwydd rŵan.

PENDERFYNWYD derbyn yr adroddiad.

Cyflwyno adroddiad y Swyddog Monitro.

Mabwysiadu'r Rheolau Gweithdrefn Contract newydd (Adran 17) a ddangosir yn Atodiad 1 i’r adroddiad a gyflwynwyd i’r Cyngor.

Gosododd y Swyddog Monitro y cyd-destun a chyflwynodd y Cyfreithiwr adroddiad:-

·         yn nodi bod y Ddeddf Caffael 2023 a ddaeth i rym ar 24 Chwefror, 2025 yn golygu bod rhaid i’r Cyngor adolygu a diwygio ei reolau caffael mewnol sydd wedi’u cynnwys o fewn y Rheolau Gweithdrefn Contract i adlewyrchu’r newid yn y ddeddfwriaeth er mwyn sicrhau cydymffurfiaeth â’r ddeddf.

·         yn gofyn i’r Cyngor newid y Cyfansoddiad drwy fabwysiadu’r Rheolau Contract newydd (Adran 17) a ddangosir yn Atodiad 1 i’r adroddiad.

Rhoddwyd cyfle i’r aelodau ofyn cwestiynau a chyflwyno sylwadau.

Croesawyd y rheoliadau a dymunwyd yn dda i bawb sy’n gweithio yn y maes Caffael.

Nodwyd nad oedd yna lawer o gyfeiriadau yn y Rheoliadau at sgiliau ieithyddol yn yr is-gontractio ac awgrymwyd bod cyfle euraid yn cael ei golli yma.  Derbynnid bod yna reolau contractio yn ymwneud â gwahaniaethu, ond roedd y gyfraith yn dweud bod modd blaenoriaethu mewn gwahanol amgylchiadau wrth gyflawni nod cyfreithlon fel hyrwyddo’r iaith Gymraeg.  Gan hynny, cynigiwyd gwelliant i ohirio mabwysiadu’r Rheoliadau hyd oni fydd y Pwyllgor Iaith wedi cael cyfle i graffu hyn.  Mewn ymateb, nodwyd:-

·         Bod hwn yn fater o gydymffurfiaeth â deddfwriaeth sydd mewn llaw bellach, a bod rhaid i’r Cyngor gael rheolau sy’n cyd-fynd â’r ddeddfwriaeth yma.

·         Bod y gwelliant yn ymwneud â pholisi caffael yn hytrach na’r gyfundrefn gyfreithiol, h.y. beth mae’r Cyngor yn ei brynu yn hytrach na sut mae’r Cyngor yn ei brynu.

·         O bosib’ bod hyn yn fater i’w godi yn y Pwyllgor Iaith o ran sut mae caffael yn adlewyrchu gofynion iaith, ayb.

·         Nad oedd hyn yn cau’r drws o ran cynnal adolygiadau pellach yn y dyfodol.

Nododd y Prif Weithredwr fod rhwydd hynt i’r Pwyllgor Iaith edrych ar unrhyw bwnc, ond na fyddai hynny’n newid y penderfyniad.

Holwyd a allai’r swyddogion fod yn ffyddiog bod y polisi’n helpu i gadw’r budd yn lleol, ac ar ba lefel o dendr mae’n gorfod mynd allan ar Gwerthwch i Gymru?  Mewn ymateb, nodwyd:-

·         Mai hanfod y rheoliadau newydd yw tryloywder, a bellach bod rhaid hysbysebu gwybodaeth am dendrau islaw'r rhiniogau uchel oedd yn bodoli’n flaenorol.

·         Bod y dull o fynd at i dendro wedyn yn fater o ddewisiadau, ond fframwaith gyfreithiol ydoedd, ac roedd yna lawer mwy o ofyn ar lefel llawer is o ran ymwybyddiaeth o dendrau a phrosesau caffael hefyd.

PENDERFYNWYD mabwysiadu'r Rheolau Gweithdrefn Contract newydd (Adran 17) a ddangosir yn Atodiad 1 i’r adroddiad a gyflwynwyd i’r Cyngor.

Cyflwyno adroddiad y Pennaeth Gwasanaethau Democratiaeth.

Mabwysiadu’r Calendr Pwyllgorau ar gyfer 2025/26 yn Atodiad 1 i’r adroddiad a gyflwynwyd i’r Cyngor.

Cyflwynodd y Pennaeth Gwasanaethau Democratiaeth galendr ar gyfer dyddiadau cyfarfodydd y Cyngor ar gyfer 2025/26.

Ymhellach i gynnwys yr adroddiad, nodwyd yr ymgynghorwyd hefyd â’r Awdurdod Heddlu a’r Awdurdod Tân ac Achub ar fersiwn drafft y calendr pwyllgorau.  Derbyniwyd ymateb gan Awdurdod yr Heddlu, ac roedd y swyddogion yn gweithio ar un dyddiad sy’n gwrthdaro.  Ni dderbyniwyd ymateb gan yr Awdurdod Tân ac Achub, a byddai’r swyddogion yn mynd ar ôl hynny.

PENDERFYNWYD mabwysiadu’r Calendr Pwyllgorau ar gyfer 2025/26 yn Atodiad 1 i’r adroddiad a gyflwynwyd i’r Cyngor.

Yn unol â’r Rhybudd o Gynnig a dderbyniwyd dan Adran 4.19 o’r Cyfansoddiad, bydd y Cynghorydd Elwyn Edwards yn cynnig fel a ganlyn:-

Mae Cyngor Gwynedd yn gofyn i’r Llywodraeth Lafur yn San Steffan i drosglwyddo’r Awdurdodaeth Gyfiawnder i’r Senedd yng Nghaerdydd.

Yn 2017 sefydlodd y Blaid Lafur gomisiwn i edrych ar posibilrwydd o drosglwyddo’r cyfrifoldeb am hyn yng Nghymru i Lywodraeth Cymru. Arweiniwyd y comisiwn gan yr Arglwydd Thomas o Gwmigedd, cyn brif swyddog dros Gyfiawnder yn Lloegr a Chymru.  Ei argymhelliad cadarn i’r llywodraeth oedd bod ‘gwir angen datganoli’r Gwasanaeth Cyfiawnder yng Nghymru i  Gymru gan sefydlu awdurdodaeth Gymreig ar wahân.

Mae gan yr Alban a Gogledd Iwerddon eu system Gyfiawnder eu hunain ond  mae Cymru ynghlwm wrth Loegr. Cymru yw’r unig wlad yn y byd sydd a deddfwriaeth ond heb awdurdod i weithredu hyn.

Er bod yna alw cynyddol dros greu Awdurdodaeth Gymreig ar wahân ac i ddatganoli’r pwerau i Lywodraeth Cymru ni fu unrhyw symudiad o du Llywodraethau Torïaidd na Llafur i wneud hyn.

Gofynnwn felly i’r Llywodraeth Lafur yn San Steffan i weithredu ar argymhelliad yr Arglwydd Thomas.

Gan ofyn i holl gynghorau Cymru am eu cefnogaeth.

Mae Cyngor Gwynedd yn gofyn i’r Llywodraeth Lafur yn San Steffan drosglwyddo’r Awdurdodaeth Gyfiawnder i’r Senedd yng Nghaerdydd, ac yn gofyn i Lywodraeth Cymru a holl gynghorau Cymru am eu cefnogaeth.

Cyflwynwyd y rhybudd o gynnig a ganlyn gan y Cynghorydd Elwyn Edwards o dan Adran 4.19 y Cyfansoddiad, ac fe’i eiliwyd:-

Mae Cyngor Gwynedd yn gofyn i’r Llywodraeth Lafur yn San Steffan drosglwyddo’r Awdurdodaeth Gyfiawnder i’r Senedd yng Nghaerdydd, ac yn gofyn i holl gynghorau Cymru am eu cefnogaeth.

Gosododd yr aelod y cyd-destun i’w gynnig, gan nodi:-

·         Yn 2017, y sefydlodd y Blaid Lafur gomisiwn i edrych ar y posibilrwydd o drosglwyddo’r cyfrifoldeb am y Gwasanaeth Cyfiawnder yng Nghymru i Lywodraeth Cymru.  Arweiniwyd y comisiwn gan yr Arglwydd Thomas o Gwmigedd, cyn brif swyddog dros Gyfiawnder yn Lloegr a Chymru, a’i argymhelliad cadarn i’r llywodraeth oedd bod ‘gwir angen datganoli’r Gwasanaeth Cyfiawnder yng Nghymru i Gymru gan sefydlu awdurdodaeth Gymreig ar wahân.

·         Bod gan yr Alban a Gogledd Iwerddon eu system Gyfiawnder eu hunain, ond bod Cymru ynghlwm wrth Loegr, ac mai Cymru yw’r unig wlad yn y byd sydd â deddfwriaeth, ond heb awdurdod i weithredu hyn.

·         Er bod yna alw cynyddol dros greu Awdurdodaeth Gymreig ar wahân ac i ddatganoli’r pwerau i Lywodraeth Cymru, ni fu unrhyw symudiad o du’r Llywodraethau Torïaidd na Llafur i wneud hyn.

Nododd y cynigydd ymhellach y dylai fod wedi cynnwys ‘a gofyn hefyd i Lywodraeth Cymru am ei chefnogaeth’ fel rhan o’i gynnig.

Cynigiodd aelod arall welliant i’r perwyl hynny.  Cydsyniodd y cynigydd a’r eilydd i’r addasiad ac ni fu gwrthwynebiad i hynny o’r llawr.

PENDERFYNWYD mabwysiadu’r cynnig wedi’i addasu, sef:-

Mae Cyngor Gwynedd yn gofyn i’r Llywodraeth Lafur yn San Steffan drosglwyddo’r Awdurdodaeth Gyfiawnder i’r Senedd yng Nghaerdydd, ac yn gofyn i Lywodraeth Cymru a holl gynghorau Cymru am eu cefnogaeth.

Yn unol â’r Rhybudd o Gynnig a dderbyniwyd dan Adran 4.19 o’r Cyfansoddiad, bydd y Cynghorydd Elfed Wyn ap Elwyn yn cynnig fel a ganlyn:-

Mae’r Cyngor yn galw ar Lywodraeth San Steffan i ddatganoli grymoedd dros ddarlledu a’r cyfryngau i’r Senedd, ac i Lywodraeth Cymru fynd ymlaen gyda’r gwaith o baratoi a thrafod gyda San Steffan ar y ffordd orau i wireddu hyn.

Mae’r Cyngor yn galw ar Lywodraeth San Steffan i ddatganoli grymoedd dros ddarlledu a’r cyfryngau i’r Senedd, ac i Lywodraeth Cymru fynd ymlaen gyda’r gwaith o baratoi a thrafod gyda San Steffan ar y ffordd orau i wireddu hyn.

Cyflwynwyd y rhybudd o gynnig a ganlyn gan y Cynghorydd Elfed Wyn ap Elwyn o dan Adran 4.19 y Cyfansoddiad, ac fe’i eiliwyd:-

Mae’r Cyngor yn galw ar Lywodraeth San Steffan i ddatganoli grymoedd dros ddarlledu a’r cyfryngau i’r Senedd, ac i Lywodraeth Cymru fynd ymlaen gyda’r gwaith o baratoi a thrafod gyda San Steffan ar y ffordd orau i wireddu hyn.

Gosododd yr aelod y cyd-destun i’w gynnig, gan nodi:-

·         Ei bod wedi dod yn amlwg dros y blynyddoedd diwethaf nad yw Cymru’n cael y darlun llawn pan mae’n dod i drafod y materion sy’n allweddol i ni fel Cenedl, a bod diffyg cael rheolaeth dros y cyfryngau wedi achosi penbleth i bobl y wlad wrth drafod protestiadau, argyfyngau a materion cyffredinol sy’n ein heffeithio ni fel pobl o ddydd i ddydd.

·         Bod y cyfnod clo yn ystod Cofid yn enghraifft amlwg o hyn, pan fu’r cyfryngau yn rhannu newyddion nad oedd yn berthnasol i Gymru, gan greu dryswch o ran hawl pobl i groesi ffiniau.

·         Y gwelwyd yr un hen stori hefyd wrth i faterion Cymreig gael eu trafod ar y newyddion cenedlaethol a’r papurau; materion sy’n cynnwys datganoli, protest y ffermwyr, y gofal iechyd cenedlaethol, a llu o faterion pwysig, oherwydd prin iawn ydi’r persbectif Cymreig a’r amser sy’n cael ei ddynodi i’r materion yma.

·         Ei bod yn destun siom hefyd nad yw darlledu Cymraeg wedi cael yr un cyfle i dyfu â chyfryngau mewn gwledydd tebyg, megis Catalwnia a Gwlad y Basg, sydd ag amryw o sianeli yn eu hieithoedd eu hunain, yn ogystal â sianeli dwyieithog, a sianeli yn y Sbaeneg sydd â phersbectif Catalaneg / Basgeg.

·         Heb drafodaeth lawn, glir, gyda phersbectif Cymreig ar y materion allweddol yma, ei bod yn mynd yn anodd deall beth yw’r camau nesaf i’w cymryd, a’n bod, felly, yn tueddu i droi mewn cylchoedd ar bynciau llosg heb wybod beth yw’r ffordd i’w datrys.

·         Ei bod yn bwysig bod Llywodraeth San Steffan a Llywodraeth Cymru yn dechrau trafod ar unwaith sut mae modd datganoli darlledu a’r cyfryngau, drwy edrych ar y ffordd i’w ariannu a’i wneud yn gynaliadwy.

Mynegwyd cefnogaeth i’r cynnig gan aelodau eraill, a nodwyd:-

·         Y sefydlwyd sianeli teledu / radio yng Ngwlad y Basg a Chatalwnia tua’r un adeg a phan sefydlwyd S4C a Radio Cymru yma yng Nghymru.  O ran cyd-destun, roedd gan Wlad y Basg 1 sianel deledu ac 1 sianel radio ar y cychwyn, ond bellach roedd ganddynt 6 sianel deledu a 5 sianel radio.  Ar y cychwyn roedd gan Gatalwnia 1 sianel deledu ac 1 sianel radio, ond bellach roedd ganddynt 6 sianel deledu a 3 sianel radio.

·         Bod Bil Cyfryngau 2024 Llywodraeth y DU yn disodli’r angen i gynnig darpariaeth trwy gyfrwng y Gymraeg, ac er i Bwyllgor Diwylliant Senedd Cymru fynegi pryder clir ynglŷn â hynny, ni chafodd y cymal ei warchod.  O ganlyniad, daeth dros 20 mlynedd o ddarlledu Cymraeg ar y sianeli masnachol, gan gynnwys Champion, Heart a Capital, i ben ar 24 Chwefror eleni,  ...  view the full COFNODION text for item 16b

(1)  Llythyr gan Lywodraeth y DU mewn ymateb i Rybudd o Gynnig y Cynghorydd Meryl Roberts i gyfarfod 3 Hydref, 2024 o’r Cyngor ynglŷn â Thaliadau Tanwydd Gaeaf.

(2)  E-bost gan Sian Gwenllian, AS, mewn ymateb i Rybudd o Gynnig y Cynghorydd Elin Walker Jones i gyfarfod 5 Rhagfyr, 2024 o’r Cyngor ynglŷn â sefydlu Ysgol Ddeintyddiaeth ym Mangor.

(3)  Llythyr gan Lywodraeth Cymru mewn ymateb i Rybudd o Gynnig y Cynghorydd Rhys Tudur i gyfarfod 5 Rhagfyr, 2024 o’r Cyngor ynglŷn â Threth Trafodiadau Tir.

(4)  Llythyr gan Lywodraeth Cymru mewn ymateb i Rybudd o Gynnig y Cynghorydd John Pughe Roberts i gyfarfod 5 Rhagfyr, 2024 o’r Cyngor ynglŷn â Rhyddhad Eiddo Amaethyddol.

(5)  Llythyr gan Lywodraeth Cymru mewn ymateb i Rybudd o Gynnig y Cynghorydd Delyth Lloyd Griffiths i gyfarfod 5 Rhagfyr, 2024 o’r Cyngor ynglŷn â chyfnewid tai cymdeithasol.

(6)  Llythyr gan Lywodraeth y DU mewn ymateb i Rybudd o Gynnig y Cynghorydd June Jones i gyfarfod 5 Rhagfyr, 2024 o’r Cyngor ynglŷn â thrwyddedau gyrru graddedig.

I nodi hefyd y derbyniwyd negeseuon o gefnogaeth gan Gyngor Tref Trefdraeth a Chyngor Cymuned Bethesda i Rybudd o Gynnig y Cynghorydd Elwyn Edwards i gyfarfod 3 Hydref, 2024 o’r Cyngor yn galw am ddynodi Dydd Gŵyl Dewi yn wyliau cenedlaethol swyddogol yng Nghymru

Cyflwynwyd – er gwybodaeth:-

(1)       Llythyr gan Lywodraeth y DU mewn ymateb i Rybudd o Gynnig y Cynghorydd Meryl Roberts i gyfarfod 3 Hydref, 2024 o’r Cyngor ynglŷn â Thaliadau Tanwydd Gaeaf.

(2)       E-bost gan Sian Gwenllian, AS, mewn ymateb i Rybudd o Gynnig y Cynghorydd Elin Walker Jones i gyfarfod 5 Rhagfyr, 2024 o’r Cyngor ynglŷn â sefydlu Ysgol Ddeintyddiaeth ym Mangor.

(3)       Llythyr gan Lywodraeth Cymru mewn ymateb i Rybudd o Gynnig y Cynghorydd Rhys Tudur i gyfarfod 5 Rhagfyr, 2024 o’r Cyngor ynglŷn â Threth Trafodion Tir.

(4)       Llythyr gan Lywodraeth Cymru mewn ymateb i Rybudd o Gynnig y Cynghorydd John Pughe Roberts i gyfarfod 5 Rhagfyr, 2024 o’r Cyngor ynglŷn â Rhyddhad Eiddo Amaethyddol.

(5)       Llythyr gan Lywodraeth Cymru mewn ymateb i Rybudd o Gynnig y Cynghorydd Delyth Lloyd Griffiths i gyfarfod 5 Rhagfyr, 2024 o’r Cyngor ynglŷn â chyfnewid tai cymdeithasol.

(6)       Llythyr gan Lywodraeth y DU mewn ymateb i Rybudd o Gynnig y Cynghorydd June Jones i gyfarfod 5 Rhagfyr, 2024 o’r Cyngor ynglŷn â thrwyddedau gyrru graddedig.

Nodwyd hefyd y derbyniwyd negeseuon o gefnogaeth gan Gyngor Tref Trefdraeth a Chyngor Cymuned Bethesda i Rybudd o Gynnig y Cynghorydd Elwyn Edwards i gyfarfod 3 Hydref, 2024 o’r Cyngor yn galw am ddynodi Dydd Gŵyl Dewi yn wyliau cenedlaethol swyddogol yng Nghymru.