Rhaglen, penderfyniadau a chofnodion

I dderbyn unrhyw ymddiheuriadau am absenoldeb

Derbyniwyd ymddiheuriadau gan y Cynghorwyr Cai Larsen a Gareth Roberts.

Croesawyd Miriam Williams (Cyfreithiwr) i’r cyfarfod.

I dderbyn unrhyw ddatganiad o fuddiant personol ac i nodi materion protocol. 

a)            Datganodd yr aelod canlynol ei fod gyda buddiant mewn perthynas â’r eitem a nodir:

Y Cynghorydd Gruffydd Williams  (oedd yn Aelod o’r Pwyllgor Cynllunio hwn), yn eitem 5.2 (C23/0543/43/LL) ar y rhaglen oherwydd ei fod yn fab i’r ymgeisydd

Roedd yr Aelod o’r farn ei fod yn fuddiant a oedd yn rhagfarnu a gadawodd y cyfarfod yn ystod y drafodaeth ar y cais.

b)            Datganodd yr aelodau canlynol eu bod yn aelodau lleol mewn perthynas â’r eitem a nodir:

·           Y Cynghorydd Jina Gwyrfai (nad oedd yn aelod o’r Pwyllgor Cynllunio hwn), yn eitem 5.2 (C23/0543/43/LL) ar y rhaglen

·           Y Cynghorydd Gareth Morris Tudor Jones (oedd yn aelod o’r Pwyllgor Cynllunio hwn), yn eitem 5.3 (C23/0201/08/LL) ar y rhaglen

Nodi unrhyw eitemau sy’n fater brys ym marn y cadeirydd fel y gellir eu hystyried.

Dim i’w nodi

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 11 Medi 2023 fel rhai cywir  

Derbyniodd y Cadeirydd gofnodion cyfarfod blaenorol y pwyllgor hwn a gynhaliwyd 11 Medi 2023 fel rhai cywir.

Cyflwyno adroddiad Pennaeth Adran Amgylchedd

Rhoddodd y Pwyllgor ystyriaeth i’r ceisiadau canlynol i ddatblygu. Ymhelaethwyd ar fanylion y ceisiadau ac ymatebwyd i gwestiynau mewn perthynas â’r cynlluniau ac agweddau o’r polisïau

Materion a gadwyd yn ôl yn sgil derbyn caniatâd cynllunio amlinellol C18/0365/11/AM ar gyfer 9 tŷ newydd gyda modurdai integredig gan gynnwys manylion gosodiad, graddfa, ymddangosiad, mynediad a thirlunio.

Aelod Lleol: Cynghorydd Gareth Roberts

Dolen i'r dogfennau cefndir perthnasol

PENDERFYNIAD: Caniatáu gydag amodau

1.    Oriau gwaith adeiladu

2.    Graddfa mynedfa i fannau parcio i’w gytuno o flaen llaw yn unol ag amod 4 o’r caniatâd cynllunio amlinellol

Materion a gadwyd yn ôl yn sgil derbyn caniatâd cynllunio amlinellol C18/0365/11/AM ar gyfer 9 tŷ newydd gyda modurdai integredig gan gynnwys manylion gosodiad, graddfa, ymddangosiad, mynediad a thirlunio.

Tynnwyd sylw at y ffurflen sylwadau hwyr

a)    Amlygodd yr Uwch Swyddog Rheolaeth Datblygu fod y cais yn gais materion a gadwyd yn ôl ar gyfer codi 9 tŷ tri llawr gyda modurdai integredig mewn ardal anheddol o Ganolfan Isranbarthol Bangor fel y’i diffinnir gan Gynllun Datblygu Lleol ar y cyd Gwynedd a Môn (CDLl). Rhoddwyd caniatâd i ddatblygu'r safle yn wreiddiol yn 2018 (C18/0365/11/AM) ac roedd y materion a gadwyd yn ôl yn cynnwys tirlunio, ymddangosiad, mynediad, cynllun a maint.

Eglurwyd bod  yr egwyddor o ddatblygu 9 tŷ ar y safle o’r maint a natur a gynigiwyd eisoes wedi ei dderbyn trwy’r caniatâd amlinellol ac felly ni roddwyd ystyriaeth bellach i’r egwyddor hwnnw. Nodwyd bod cytundeb 106 mewn lle i sicrhau bydd 7 uned ar gyfer y farchnad agored a 2 yn dai fforddiadwy gyda’r unedau yn parhau i gydymffurfio â gofynion Canllaw Cynllunio Atodol Tai Fforddiadwy o ran maint.

Ategwyd bod y cynlluniau manwl a gyflwynwyd yn gwbl gyson gyda’r cynlluniau mynegol a gyflwynwyd gyda’r cais amlinellol; y safle wedi ei leoli o fewn ardal drefol gymysg gyda thai cyfagos o ddyluniad, cynllun a maint tebyg i’r hyn a gynigiwyd.

Ystyriwyd fod y bwriad yn dilyn patrwm datblygedig y tai presennol agosaf o fewn stad Maes Berea a bod eu hymddangosiad, yn briodol wrth ystyried eu cyd-destun adeiledig.  Byddai’r manylion a gyflwynwyd yn cynnig parhad rhesymegol i’r stad tai presennol ac fellr’ cynigion ar gyfer tirlunio, ymddangosiad, mynediad, cynllun a maint ar gyfer y datblygiad yn dderbyniol, ac na fyddant yn amharu ar gymeriad ac edrychiad yr ardal.

b)    Cynigiwyd ac eiliwyd caniatáu’r cais

            PENDERFYNWYD: Caniatáu gydag amodau

            1.         Oriau gwaith adeiladu

            2.         Graddfa mynedfa i fannau parcio i’w gytuno o flaen llaw yn unol ag amod 4   o’r caniatâd cynllunio amlinellol

Cais llawn i uwchraddio Parc Carafanau presennol trwy leoli pum caban newydd, cadw'r ffordd fynediad dros dro a chreu cae chwarae

Aelod Lleol: Cynghorydd Jina Gwyrfai

Dolen i'r dogfennau cefndir perthnasol

PENDERFYNIAD: Caniatáu yn groes i'r argymhelliad

Amodau:

• 5 mlynedd
• Yn unol â’r cynlluniau
• Defnydd gwyliau yn unig
• Cadarnhau nifer unedau ar y safle yn ei gyfanrwydd
• Cyflwyno manylion ynglŷn â’r man chwarae neu waith cysylltiol iddo
• Bod y bwnd yn cael ei adeiladu cyn y gwaith ail-leoli
• Materion archeolegol

Cais llawn i uwchraddio Parc Carafanau presennol trwy leoli pum caban newydd, cadw'r ffordd fynediad dros dro a chreu cae chwarae

Tynnwyd sylw at y ffurflen sylwadau hwyr

Roedd rhai o’r Aelodau wedi ymweld â’r safle 02-10-23

a)    Amlygodd Arweinydd Tîm Rheolaeth Datblygu mai cais llawn ydoedd ar gyfer uwchraddio ac ymestyn safle carafanau presennol. Eglurwyd bod y cais yn cynnwys bwriad i ail-leoli pum caban gwyliau o fewn safle a nodir fel cae 470 (Cwrs Golff) ynghyd a chadw ffordd fynediad a ganiatawyd yn wreiddiol am gyfnod dros dro ar gyfer gwasanaethu’r unedau ychwanegol, ynghyd a chreu cae chwarae. Bu cwrs golff ar y lleoliad yn y gorffennol, ond yn amlwg bod y defnydd yma bellach wedi dirwyn i ben. Rhoddwyd caniatâd yn 2015 i ail-leoli 5 uned sefydlog neu gaban i leoliad ar ran o ble fyddai’r cwrs golff (Cae 470) tra roedd 5 arall i’w hail-leoli i ran arall o’r safle sef cae 471.

Er eglurder byddai’r bwriad yn golygu lleoli’r cyfan o’r cabanau gyda’i gilydd ar gae 470 yn lle’r caniatâd a roddwyd i leoli pump ar gae 470 a phump arall ar gae 471. Tybiwyd y byddai’r cabanau gwyliau arfaethedig yn mesur yr un peth a’r hyn a ganiatawyd eisoes.Yn ogystal bwriedir codi clawdd pridd newydd ar hyd terfyn gogleddol a gorllewinol cae 470.

Nodwyd bod y safle wedi ei leoli mewn ardal ddiarffordd a chymharol fynyddig yng nghefn gwlad agored o fewn Ardal o Harddwch Naturiol Eithriadol Llŷn (AHNE) a Tirwedd o Ddiddordeb Hanesyddol Eithriadol Llŷn ac Enlli. Mae’r adeilad preswyl, sef Gwynus, a leolir ar ran o’r safle yn adeilad rhestredig gradd II. Ceir mynedfa tuag at y safle oddi ar y ffordd gyhoeddus agosaf ar hyd ffordd ddi-ddosbarth sydd yn gwyro i’r gogledd cyn cyrraedd y safle ei hun ac yna ar hyd ffordd fynediad preifat; y  ffordd ddi-ddosbarth hefyd wedi ei ddynodi fel llwybr cyhoeddus. Nodwyd bod y safle yn gweithredu ac wedi hen sefydlu fel parc carafanau.

Cyflwynwyd y cais i Bwyllgor gan fod perthynas agos i’r ymgeisydd yn aelod etholedig o’r Cyngor.

Yng nghyd-destun egwyddor y datblygiad adroddwyd mai’r prif bolisi perthnasol oedd TWR 3 a pherthynas y safle a'i leoliad  o fewn yr AHNE.  Nodwyd bod rhan 3 o’r polisi yn derbyn y gellid caniatáu estyniadau bychain i arwynebedd safleoedd sefydlog a / neu ail-leoli unedau o leoliadau amlwg i leoliadau llai amlwg yn ddarostyngedig i gydymffurfio gyda chyfres o feini prawf sy’n cynnwys fod bwriad yn cynnig gwelliannau sylweddol a pharhaol i ddyluniad, gosodiad ac edrychiad y safle a’i le yn y dirwedd o’i amgylch.

Ystyriwyd na fyddai’r ardal newydd yma yn estyniad bychan i arwynebedd y safle carafanau presennol ac ni welwyd rheswm digonol pam fod angen ail-leoli’r 5 uned sefydlog ychwanegol i gae 470 pan mae cynllun blaenorol wedi ei ganiatáu yn dangos y byddai’n bosibl eu lleoli ar gae 471 sydd o fewn y safle presennol ac sydd eisoes wedi ei ddatblygu.  Er derbyn dyhead yr ymgeisydd i wella’r safle, ni ellid  ...  gweld y cofnod llawn ar gyfer eitem 7.

Cais llawn i ddymchwel strwythurau presennol a chodi tŷ newydd gyda gwaith cysylltiol

Aelod Lleol: Cynghorydd Gareth Tudor Morris Jones

Dolen i'r dogfennau cefndir perthnasol

PENDERFYNIAD:

Dirprwyo’r hawl i’r Uwch Reolwr Cynllunio i ganiatáu’r cais  

Amodau

1.         Amser

2.         Yn unol â’r cynlluniau

3.         Cytuno deunyddiau gan gynnwys llechi to

4.         Cyfyngu hawliau datblygiadau a ganiateir a ffenestri

5.         Rheoli’r math o ffenestr/gwydr a osodir

6.         Tirlunio

7.         Gwelliannau Bioamrywiaeth

8.         Cynllun rheoli adeiladu

9.         Cyfyngu defnydd yr adeilad preswyl yn unig ac nid ar gyfer ail dŷ neu lety gwyliau

Cais llawn i ddymchwel strwythurau presennol a chodi tŷ newydd gyda gwaith cysylltiol

Tynnwyd sylw at y ffurflen sylwadau hwyr

Roedd rhai o’r Aelodau wedi ymweld â’r safle 02-10-23

a)            Amlygodd yr Arweinydd Tîm Rheolaeth Datblygu fod y cais wedi ei drafod eisoes mewn cyfarfod o’r pwyllgor a gynhaliwyd  Medi 11eg 2023 lle penderfynwyd gohirio’r penderfyniad er mwyn cynnal ymweliad safle fel bod modd i’r Aelodau gael cyfle i weld y safle yng nghyd-destun ei leoliad a’i effaith ar fwynderau trigolion cyfagos.

Adroddwyd mai cais llawn ydoedd i ddymchwel strwythurau presennol ac adeiladu tŷ annedd deulawr newydd ar wahân gyda gwaith cysylltiol.  Saif y safle oddi fewn i’r ffin ddatblygu ac oddi fewn Ardal Tirwedd Arbennig Gorllewin Llŷn a Tirwedd o Ddiddordeb Hanesyddol Eithriadol Llŷn ac Enlli. Nodwyd bod y cais wedi ei ddiwygio ddwywaith o’i gyflwyniad gwreiddiol mewn ymateb i sylwadau a dderbyniwyd ac yn dilyn trafodaethau gyda swyddogion.  Derbyniwyd cynllun diwygiedig pellach ar y 14.09.2023 sydd yn symud y tŷ newydd oddeutu 2m ymhellach i’r de-ddwyrain yn unol â chais yr aelod lleol.

Cyflwynwyd y cais i’r pwyllgor Cynllunio am benderfyniad ar gais yr aelod lleol oherwydd pryder am faint y tŷ arfaethedig ynghyd a’i agosatrwydd at dai eraill.

Eglurwyd bod y safle dan sylw wedi ei ddatblygu yn barod ac felly yn cael ei ystyried fel tir llwyd ac wedi ei leoli o fewn ffin ddatblygu pentref Edern. Roedd y bwriad felly yn bodloni gofynion cyffredinol polisïau PS 5, PCYFF 1 a PS17 o Gynllun Datblygu Lleol ar y Cyd Gwynedd a Môn (CDLI). Yn bresennol mae’r safle yn cynnwys siediau diwydiannol o fath sydd yn eithaf syml eu dyluniad sy’n eistedd yn ddisylw o fewn y llain.

Cydnabuwyd y byddai’r tŷ arfaethedig yn fwy o ran maint na’r adeiladau presennol, ond mewn ymateb i bryderon a amlygwyd diwygiwyd yr adeilad o’r hyn a gyflwynwyd yn wreiddiol gyda’r  tŷ newydd wedi ei leoli o fewn rhan y safle sydd o fewn y ffin ddatblygu. Er bod  hyn yn golygu ei fod yn agosach i ffin ogleddol y safle nac y byddai petai wedi ei wthio ymhellach i mewn i’r safle, ni ystyriwyd fod ei leoliad o fewn y safle yn afresymol. Adroddwyd bod uchder crib to’r sied uchaf bresennol yn 3.3m a byddai uchder crib y to arfaethedig yn 5.8m sydd fymryn yn is nag uchder crib yr eiddo cyfochrog i’r gorllewin. O ganlyniad, ni ystyriwyd y byddai’n sefyll allan fel nodwedd cwbl anghydnaws yn y rhan yma o’r pentref nac yn gwbl groes i’r patrwm datblygu cyffredinol a welir yno. Ni ystyriwyd y byddai’r tŷ newydd arfaethedig yn effeithio i raddau cwbl annerbyniol ar gymeriad ac ymddangosiad y safle na’r ardal o gwmpas o ran ei ymddangosiad, graddfa, uchder na mas. Gyda phresenoldeb coed a pherthi aeddfed o fewn y safle sy’n rhoi gorchudd priodol i’r safle, ni ystyriwyd y byddai’r adeilad yn dominyddu edrychiadau tuag at y safle o fannau amlwg cyhoeddus na dynodiadau tirweddu.

Yng nghyd-destun mwynderau cyffredinol a phreswyl, amlygwyd  ...  gweld y cofnod llawn ar gyfer eitem 8.