Rhaglen, penderfyniadau a chofnodion drafft

I dderbyn unrhyw ymddiheuriadau am absenoldeb

Derbyniwyd ymddiheuriadau gan y Cynghorydd Dafydd Meurig

Bu i’r Cyng. Gareth Coj Parry golli cysylltiad yn ystod eitem 5.1 ac ni fu modd iddo ail ymuno â’r cyfarfod

Croesawyd y Cyng Lousie Hughes yn ol i’r Pwyllgor wedi cyfnod o waeledd.

I dderbyn unrhyw ddatganiad o fuddiant personol ac i nodi materion protocol. 

a)           Datganodd yr Aelodau canlynol eu bod yn Aelodau Lleol mewn perthynas â’r eitem a nodir:

Y Cynghorydd John Pughe (ward Morfa Tywyn - nad oedd yn Aelod o’r Pwyllgor Cynllunio hwn), yn eitem 5.1 C25/0403/09/CR ar y rhaglen

Y Cynghorydd Elin Walker Jones (nad oedd yn Aelod o’r Pwyllgor Cynllunio hwn), yn eitemau 5.2 C25/0705/11/LL a 5.3 C25/0706/11/LL ar y rhaglen

Y Cynghorydd Rhys Tudur (nad oedd yn Aelod o’r Pwyllgor Cynllunio hwn), yn eitem 5.4 C25/0710/41/LL ar y rhaglen

Er bod enw y Cynghorydd Anne Lloyd Jones (oedd yn Aelod o’r Pwyllgor Cynllunio hwn), yn ymddangos fel Aelod Lleol ar gais 5.1 ar y rhaglen, cadarnhaodd y Swyddog Monitro nad oedd Gwesty’r Corbett Arms (C25/0403/09/CR)  o fewn ward y Cynghorydd (Gorllewin Tywyn), ac felly roedd hawl ganddi i gymryd rhan yn y drafodaeth.

Nodi unrhyw eitemau sy’n fater brys ym marn y Cadeirydd fel y gellir eu hystyried.

Fel mater o drefn, adroddwyd, gyda’r Cadeirydd yn ymuno yn rhithiol, mai’r Swyddog Monitro fyddai’n cyhoeddi canlyniad pleidleisiau’r ceisiadau.

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 23 Mawrth 2026 fel rhai cywir  

Derbyniodd y Cadeirydd gofnodion cyfarfod blaenorol y pwyllgor hwn a gynhaliwyd 23ain  o Fawrth 2026 fel rhai cywir

Cyflwyno adroddiad Pennaeth Adran Amgylchedd.

Rhoddodd y Pwyllgor ystyriaeth i’r ceisiadau canlynol i’w datblygu. Ymhelaethwyd ar fanylion y ceisiadau ac ymatebwyd i gwestiynau mewn perthynas â’r cynlluniau ac agweddau o’r polisïau.

Cais am ganiatâd adeilad rhestredig [LBC] ar gyfer gwaith dad-adeiladu a dymchwel rhannol yr adeilad yn raddol, a’r gwaith cynhaliaeth sydd ei angen i sefydlogi y strwythur sydd yn weddill

AELODAU LLEOL: Cynghorydd John Pughe a’r Cynghorydd Anne Lloyd Jones

Dolen i'r dogfennau cefndir perthnasol

PENDERFYNIAD: Caniatáu gydag amodau

1. 5 mlynedd
2. Yn unol â'r cynlluniau
3. Cyflwyno a chytuno ar fethodoleg fanwl a chynllun graddol o'r gwaith dymchwel, i gynnwys manylion ar gyfer diogelu a gwarchod yr adeilad cyn dechrau'r gwaith. Dylai'r manylion hefyd gynnwys cynllun i adfer y porth a'r ardd ynghyd â manylion achub deunyddiau.
4. Dylid cyflogi gweithiwr cadwraeth broffesiynol gymwysedig i oruchwylio a chytuno ar y fethodoleg a'r gwaith dymchwel wrth iddynt ddechrau, ac i gael ei gytuno gyda'r Awdurdod Cynllunio Lleol (ACLl) cyn i'r gwaith ddechrau 
5. Dylai'r ACLl gytuno yn ysgrifenedig ar fanylion y bolltau angori neu'r angorau pinio cyn iddynt gael eu gosod
6. Cwblhau cofnod adeilad hanesyddol Lefel 3 o Westy'r Corbett Arms. Yn amodol ar uniondeb strwythurol gyda'r adeilad wedi'i wneud yn ddiogel ac yn saff, dylid cynnwys cofnod ffotograffig o'r tu mewn yn y cofnod hwn.

Cais am ganiatâd adeilad rhestredig [LBC] ar gyfer gwaith dad-adeiladu a dymchwel rhannol yr adeilad yn raddol, a’r gwaith cynhaliaeth sydd ei angen i sefydlogi'r strwythur sydd yn weddill

a)           Amlygodd y Rheolwr Cynllunio, wedi derbyn rhagor o wybodaeth, bod cyfanswm y gwaith dymchwel wedi'i leihau a'i fod bellach ond yn berthnasol i ran gefn yr adeilad yn unig.

Eglurwyd bod adeilad yn hen westy, sydd wedi ei restru gradd II, ac o fewn ffin datblygu Tywyn, yn strwythur sylweddol sy'n wynebu Sgwâr Corbett, gyda thalcen sy'n wynebu Stryd Maengwyn ac ychwanegiadau diweddarach i ochr chwith yr adeilad ac i'r cefn. Nodwyd hefyd bod eiddo preswyl cyfagos a'r dalcen yr adeilad ar Stryd Maengwyn. Ystyriwyd bod yr adeilad mewn perygl yn unol â chofrestr Adeiladau Rhestredig sydd Mewn Perygl, a gedwir gan Cadw.

Daeth defnydd o’r adeilad fel gwesty i ben tua 2009, a bu fawr ddim cynnal a chadw ar yr adeilad yn y blynyddoedd wedi hynny. Erbyn hyn, mae’r adeilad yn mynd â'i ben iddo, gyda rhannau o gefn yr adeilad wedi disgyn yn Ionawr a Chwefror 2025.

Cyflwynwyd gyda’r cais adroddiad arolwg strwythurol, methodoleg dymchwel a dadosod yn ogystal ag Asesiad Effaith Treftadaeth. Cyfeiriwyd at ôl troed yr adeilad cyfan oedd wedi'i rannu'n 8 parth er mwyn cyfeirio atynt yn haws. Adroddwyd bod bwriad dymchwel parthau 1-5 yn seiliedig ar sefydlogrwydd strwythurol yr adeilad oherwydd rhesymau iechyd a diogelwch yn dilyn cwymp diweddar, gyda pharthau 2 a 4 yn ardaloedd a gwympodd ym mis Ionawr a Chwefror 2025.

Nodwyd bod y cynnig diwygiedig yn gofyn am ganiatâd adeilad rhestredig ar gyfer dymchwel Parthau 1, 2, 4 a rhan o Barth 5 (a nodwyd fel 5A), ynghyd â gwaith cysylltiedig i sefydlogi'r strwythur sy'n weddill a'i ddiogelu rhag y tywydd. Ategwyd bod y cynllun presennol yn cynrychioli gostyngiad sylweddol yng ngraddfa'r gwaith dymchwel a fwriadwyd yn wreiddiol, yn dilyn ymatebion i'r ymgynghoriad a chyflwyno rhagor o wybodaeth strwythurol.

Amlygwyd, wrth benderfynu ar y cais, roedd angen ystyried yn ofalus a fyddai’n ddymunol gwarchod yr adeilad rhestredig, ei leoliad ac unrhyw nodweddion o ddiddordeb pensaernïol neu hanesyddol arbennig sydd gan yr adeilad, yn unol ag adran 96(2) Deddf yr Amgylchedd Hanesyddol (Cymru) 2023. Ategwyd nad oedd cadw adeilad neu ased hanesyddol yn golygu bod rhaid ei gynnal yn ddigyfnewid, ond bod ei arwyddocâd yn cael ei gynnal ar gyfer y dyfodol; y dyletswydd statudol wedi derbyn cryn bwysigrwydd a phwysau wrth gyrraedd yr argymhelliad.

Mynegwyd y byddai'r gwaith arfaethedig yn arwain at golli ffabrig hanesyddol o fewn y parthau a nodwyd gan achosi niwed i arwyddocâd yr adeilad rhestredig. Fodd bynnag, atgoffwyd yr Aelodau bod Parthau 2 a 4 eisoes wedi disgyn yn rhannol, bod Parth 1 yn cynnwys ystafell haul cyfoes o werth treftadaeth ddibwys, a bod Parth 5A wedi'i gyfaddawdu'n strwythurol ac yn uniongyrchol gysylltiedig â'r ardaloedd sydd wedi cwympo. Bydd y bwriad yn cadw'r prif ddrychiadau a rhan fwyaf o'r ffabrig hanesyddol sy'n diffinio cymeriad ac arwyddocâd yr adeilad, ac mae'r niwed sy'n deillio o'r  ...  gweld y cofnod llawn ar gyfer eitem 6.

Dymchwel estyniadau cefn a chodi estyniad deulawr newydd ynghyd a gwaith tirluno, codi adeilad beics a sbwriel ac ail-osod y maes parcio.

AELOD LLEOL: Cynghorydd Elin Walker Jones

Dolen i'r dogfennau cefndir perthnasol

PENDERFYNIAD: Hawl i weithredu - caniatáu gydag amodau yn ddarostyngedig i dderbyn gwybodaeth bellach a sylwadau cadarnhaol gan yr Uned Draenio 

1.         5 mlynedd

2.         Unol a’r cynlluniau.

3.         Amod archeolegol

4.         Manylion gwydriad eilradd i’w gytuno o flaen llaw.

5.         Cytuno i ail-ddefnyddio deunyddiau o’r adeilad i’w ddymchwel

6.         Nwyddau dwr glaw alwminiwm

7.         Manylion manwl y paneli solar

8.         Manylion unrhyw oleuadau i’w gytuno

9.         Manylion unrhyw arwyddion i’w gytuno

10.       Rhaid cyflwyno manylion y sgrin wrth y grisiau cyn eu gosod

11.       Rhaid cyflwyno manylion o sut i gofnodi hoel y gampfa cyn eu dymchwel

12.       Cyflwyno samplau o’r deunyddiau

13.       Defnyddio calch gydag unrhyw waith pwyntio / render

14.       Amod priffyrdd

15.       Amodau Dwr Cymru

16.       Amodau Iaith

17.       Amodau Bioamrywiaeth gan gynnwys cytuno mesurau lliniaru a          gwelliannau

18.      Cytuno Cynllun Rheoli Amgylcheddol Adeiladu (CEMP) cyn cychwyn  gwaith – i gynnwys oriau gwaith

Dymchwel estyniadau cefn a chodi estyniad deulawr newydd ynghyd a gwaith tirlunio, codi adeilad beics a sbwriel ac ail-osod y maes parcio.

Tynnwyd sylw at y Ffurflen Sylwadau Hwyr (sylwadau gan Uned Draenio Tir)

a)           Amlygodd y Swyddog Cynllunio mai cais llawn ydoedd gyda bwriad o ddymchwel rhan ddeulawr cefn o’r adeilad a chodi estyniad deulawr newydd modern i alluogi cael ystafelloedd dysgu i fyny at safonau modern. Byddai’r estyniad newydd yn gymysg o frics llwyd golau / coch a chladin alwminiwm coch i gynnwys dwy neuadd darlithio fawr, ystafell ddysgu cyffredinol, toiledau ac ardaloedd eistedd ynghyd a choridorau, grisiau a drysau allanol a lifft newydd. Ar ail lawr yr estyniad bydd gofod o’r ddwy neuadd darlithio ynghyd ag ardaloedd eistedd, toiledau, ystafelloedd offer a storfeydd - i gyd yn cysylltu yn ôl gyda’r prif adeilad. Eglurwyd bod rhan gwaith adfer mewnol o fewn y prif adeilad hefyd yn rhan o’r cais, ond nad oedd angen hawl cynllunio ffurfiol ar gyfer y gwaith, ond ei fod wedi ei asesu o fewn y cais adeilad rhestredig cysylltiedig (C25/0706/11/CR). Ategwyd bod asesiad adeilad rhestredig wedi ei gwblhau ar y gwaith dymchwel ac adeiladau’r estyniadau

Adroddwyd bod yr adeilad yn un sylweddol a thrawiadol iawn, gyda phwyslais ar ei edrychiad blaen. Ni fydd newid i’r edrychiad blaen gan fydd y gwaith dymchwel i gefn yr adeilad yn golygu  dymchwel estyniad sylweddol o’r 1930au; fodd bynnag bydd y gwaith dymchwel yn golygu bod modd codi estyniad sy’n darparu gofod pwrpasol ar gyfer sicrhau defnydd hirdymor o’r adeilad gan Brifysgol Bangor fel rhan o’u campws presennol. Nodwyd bod gwaith tirlunio, ail-osod y ddarpariaeth parcio a chreu mannau beics hefyd yn ffurfio rhan o’r cais gyda bwriad i hwyluso’r cysylltiad drwy greu llwybr newydd i gysylltu safleoedd y Brifysgol.

Saif y safle o fewn ffin ddatblygu Dinas Bangor ond tu allan i’r ardal ganolig. Amlygwyd bod safleoedd y Brifysgol ger y safle ynghyd a thai preswyl cyfagos. Yr adeilad yn adeilad rhestredig gradd II.

O ystyried defnydd blaenorol y safle fel ysgol a choleg, y polisi perthnasol oedd Polisi ISA 3 sy’n datgan y caniateir cynigion ar gyfer cyfleusterau newydd neu estyniadau i adeiladau presennol ar gyfer dibenion academaidd neu gefnogol cyn belled bod ystyriaeth i raddfa, lleoliad, dyluniad, mwynderau a chludiant.

O ran materion dyluniad, ystyriwyd bod yr estyniad wedi ei ddylunio o gwmpas nodweddion presennol yr adeilad oedd yn cynnwys defnydd lliw coch sydd o gwmpas y ffenestri; yn ddyluniad modern cyfoes wedi ei leoli i gefn y prif adeilad fel estyniad atodol. Ategwyd mai’r  prif adeilad fyddai’n parhau i fod y prif ffocws, a chyda nodweddion megis y to brig ar yr estyniad yn cyd-fynd a’r hen adeilad, ystyriwyd fod y dyluniad yn dderbyniol ac yn cydymffurfio gyda pholisïau PCYFF 2, PCYFF 3 a PS 20.

Yng nghyd-destun materion trafnidiaeth a mynediad, nodwyd bod datganiad trafnidiaeth wedi ei gyflwyno gyda’r cais yn mynegi nad oedd bwriad newid nag addasu’r mynediad cerbydol presennol, ond i ail-osod y llecynnau parcio presennol o fewn y  ...  gweld y cofnod llawn ar gyfer eitem 7.

Dymchwel estyniadau cefn a chodi estyniad deulawr newydd ag addasiadau mewnol i'r prif adeilad

AELOD LLEOL: Cynghorydd Elin Walker Jones

Dolen i'r dogfennau cefndir perthnasol

PENDERFYNIAD: Caniatáu’r cais yn ddarostyngedig i’r amodau canlynol :

1.         5 mlynedd

2.         Unol â’r cynlluniau.

3.         Amodau heneb

4.         Manylion gwydriad eilradd i’w cytuno o flaen llaw.

5.         Cytuno i ail-ddefnyddio deunyddiau o’r adeilad i’w ddymchwel

6.         Nwyddau dŵr glaw alwminiwm

7.         Manylion manwl y paneli solar

8.         Manylion unrhyw oleuadau i’w cytuno

9.         Manylion unrhyw arwyddion i’w cytuno

10.       Rhaid cyflwyno manylion i sgrin wrth y grisiau cyn eu gosod

11.       Rhaid cyflwyno manylion o sut i gofnodi hoel y gampfa cyn eu dymchwel

12.       Cyflwyno samples o’r deunyddiau

13.       Defnyddio calch gydag unrhyw waith pwyntio / render

Cais adeilad rhestredig i ddymchwel estyniadau cefn a chodi estyniad deulawr newydd ag addasiadau mewnol i'r prif adeilad

a)               Amlygodd y Rheolwr Cynllunio bod rhan o’r prif adeilad, sy’n weladwy o Ffordd Ffriddoedd, yn adeilad deulawr trawiadol iawn o garreg ac wedi ei godi oddeutu 1899. Adroddwyd bod tystiolaeth yn bodoli yn dangos fod yr ysgol wedi esblygu a datblygu dros amser, ac erbyn y 1940au dyma’r adeilad sydd mewn bodolaeth - adeilad wedi ei restru gradd II.  Nodwyd bod dau adeilad arall ar wahân yn ffurfio rhan o’r safle, ond nid ydynt yn ffurfio rhan o’r cais.

Y bwriad yw dymchwel y rhan deulawr cefn a ychwanegwyd yn y 1930au a chodi estyniad deulawr newydd, modern er galluogi cael ystafelloedd dysgu i fyny at safonau modern. Byddai’r estyniad wedi ei orffen yn gymysg o bric llwyd golau / coch a chladin alwminiwm coch. Bydd yr edrychiad blaen, sef yr edrychiad deheuol sydd yn wynebu Ffordd Ffriddoedd yn parhau fel y mae, gan mai hwn yw’r darn gwreiddiol. Ar ochr orllewinol y prif adeilad, bwriedir tynnu’r porth ceir presennol ynghyd a thynnu offer peirianyddol awyru oddi ar y to a gosod awyrellau newydd.

Yng nghyd-destun addasiadau mewnol, bwriedir tynnu llawer o waith modern sydd wedi ychwanegu dros amser, cau agoriadau presennol ac agor rhai newydd, tynnu nenfydau ffug, gosod waliau rhannol newydd, tynnu wal fewnol ond cadw’r rhannau ar yr ochr, atgyweirio’r ffenestri ynghyd â thynnu plaster modern oddi ar y waliau.  Mae sawl drws gwreiddiol hefyd yn bodoli a bwriedir eu cadw a’i ail-ddefnyddio.

Cyflwynwyd gwybodaeth fel rhan o’r cais oedd  yn amlygu bod rhan o’r adeilad a fwriedir ei ddymchwel yn eithaf cyfoes efo’r prif adeilad, fodd bynnag, oherwydd diffyg sylweddol o ran gwaith cynnal a chadw dros amser, nodwyd bod y rhan yma mewn cyflwr gwael ac nid yw maint a gofod yr ystafelloedd yn addas i ofynion y Brifysgol fel neuadd ddarlithio. Ategwyd er bod cofnod helaeth wedi ei wneud o’r adeilad, gyda rhannau cefn yn bwysig o ran datblygiad a hanes y safle, nid yw’n bosib trosi'r rhain i ddefnydd darlithio ac ystyriwyd y byddai eu dymchwel a darparu gofod mwy addas yn darparu dyfodol hir dymor i’r safle. Nodwyd hefyd bod ymdrech wedi ei wneud i ail-ddefnyddio’r deunyddiau o’r rhan sydd i’w ddymchwel a chadw hoel siâp y gampfa ar y llawr o fewn yr estyniad newydd i gadw tystiolaeth o’r lleoliad. Bydd y gwaith mewnol yn golygu dileu nodweddion anaddas modern ac adfer elfennau hanesyddol a nodweddiadol yr adeilad.

Eglurwyd bod yr estyniad o ddyluniad modern sy’n gweddu nodweddion dyluniad a lliwiau gorffeniad y prif adeilad; y cynllun o’r edrychiad blaen yn dangos rhannau o’r estyniad newydd yn weladwy, ac yn dilyn derbyn gwybodaeth ychwanegol sy’n rhoi ystyriaeth i natur y tir sydd yn codi oddi ar y brif ffordd, ni fydd yr estyniad yn weladwy o’r blaen. Er yn weladwy o’r ochrau eraill, ystyriwyd y byddai hyn yn dderbyniol o ran gweld yr adeilad yn ei gyfanrwydd ac ni fyddai’r estyniad yn  ...  gweld y cofnod llawn ar gyfer eitem 8.

Codi 25 o dai fforddiadwy, creu mynedfa newydd i gerbydau o'r B4354 ynghŷd â gwaith cysylltiedig

AELOD LLEOL: Cynghorydd Rhys Tudur

Dolen i'r dogfennau cefndir perthnasol

PENDERFYNIAD: Gwrthod y cais yn groes i’r argymhelliad

Rheswm: Ar sail diffyg angen am y tai fforddiadwy sydd wedi eu lleoli ar y rhan o’r safle sy’n ffurfio safle eithrio

O ganlyniad, bydd y cais yn cael ei gyfeirio at gyfnod cnoi cil ac yn dychwelyd i’r Pwyllgor ar ddyddiad arall gydag adroddiad yn amlygu risgiau sydd yn codi o’r rheswm gwrthod yma a’r rhesymau a nodwyd gan yr Aelod Lleol yn ystod y Pwyllgor.

Tir cyfochrog â  Brynhyfryd / Cae Capel, Chwilog, LL53 6SF

Codi 25 o dai fforddiadwy, creu mynedfa newydd i gerbydau o'r B4354 ynghyd â gwaith cysylltiedig

a)           Amlygodd y Rheolwr Cynllunio bod mwyafrif o ardal y cais llawn yma o fewn safle oedd wedi ei dderbyn a’i glustnodi fel un addas ar gyfer datblygiad preswyl trwy ei ddynodiad ffurfiol yn y CDLl ar gyfer y bwriad penodol yma. Nodwyd bod statws pentref Chwilog (pentref a ddiffinnir fel Pentref Gwasanaeth o fewn y CDLl) yn golygu mai tai newydd ar gyfer gwasanaethu Gwynedd yn ei gyfarwydd sydd yn ddisgwyliedig ar gyfer y safle fel yn achosion safleoedd cyffelyb eraill sydd wedi eu dynodi trwy’r Sir. Tynnwyd sylw at y ffaith bod rhan yng ngogledd orllewin y safle y tu allan i ddynodiad y ffin datblygu ei hun ac felly ystyriwyd y rhan yma fel safle eithrio. 

Eglurwyd bod ffordd gyhoeddus dosbarth 2 y B4354 yn rhedeg yn gyfochrog gyda ffin ogleddol y safle; bod tai preswyl yn ymylu yn uniongyrchol gyda ffin ddwyreiniol y safle, a thai preswyl hefyd yr ochr arall i’r ffordd i’r gogledd. Nodwyd bod rhan o’r safle sydd y tu allan i’r ffin datblygu yn ymylu gyda rhan gogledd orllewin y prif safle ac yn bresennol yn ffurfio rhan o gwrtil eiddo preswyl cyfochrog  - fferm Brynhyfryd.

Bydd y cynnig, yn benodol, yn cynnwys 6 fflat un ystafell wely, 9 tŷ dwy ystafell wely, 8 tŷ tair ystafell wely a 2 byngalo dwy ystafell wely – y datblygiad arfaethedig yn cynnig tai 100% o dai fforddiadwy gyda chymysgedd o ran deiliadaeth yn cael ei ddarparu. O ran edrychiad, bydd y tai wedi’u gorffen mewn cymysgedd o ddeunyddiau i gyfleu gwahanol arddulliau ac i amrywio’r edrychiad ar y safle.

Adroddwyd bod y Pwyllgor Cynllunio eisoes wedi cymeradwyo'r egwyddor o ddatblygiad preswyl ar y safle dynodedig yma ar dri achlysur yn y gorffennol, ac fe amlygwyd bod yr ystyriaethau polisi a wnaed i’r ddau gais ddiweddar yn parhau yr un fath – ystyriwyd bod cyfiawnhad ac angen ar gyfer y bwriad, a’i fod yn parhau i gyfarch anghenion y gymuned leol. Cyflwynwyd gwybodaeth fel rhan o’r cais gan yr Uned Strategol Tai yn dangos yr angen yn glir.

Yng nghyd-destun y tir sydd y tu allan i’r ffin datblygu a’r dynodiad sy’n ffurfio safle eithrio, eglurwyd mai gofynion polisi TAI 16 oedd yn berthnasol i’r elfen yma o leoli 4 tŷ yn y rhan yma o’r safle (2 dŷ tair ystafell wely, 1 tŷ dwy ystafell wely ac 1 byngalo dwy ystafell wely). Ategwyd, o ran ystyriaeth i’r galw am y 4 tŷ, mae diffiniad lleol ar eu cyfer sy’n cynnwys pentref Chwilog ei hun ynghyd a’r ardal wledig gyfagos (sef pellter o 6km o safle'r cais a holl ardal unrhyw Gyngor Cymuned sy'n cael ei rhannu gan y pellter 6km, gan eithrio eiddo o fewn ffin ddatblygu unrhyw anheddiad oni bai am yr anheddiad hwnnw lle mae’r cais wedi’i leoli). Amlygwyd bod gwybodaeth ar gyfer yr  ...  gweld y cofnod llawn ar gyfer eitem 9.

Amnewid ceblau tanddaearol presennol a gosod ceblau tanddaearol traws-safle newydd yn is-orsaf presennol Pentir yn ogystal a gwaith cysylltiol.

AELOD LLEOL: Cynghorydd Menna Baines

Dolen i'r dogfennau cefndir perthnasol

PENDERFYNIAD: Caniatáu gydag amodau

1. 5 mlynedd
2. Yn unol â'r cynlluniau, hol argymhellion y dogfennau ac asesiadau, a'r Datganiad Amgylcheddol a gymeradwywyd
3. Amodau Gwarchod y Cyhoedd
4. Amodau Cefnffyrdd
5. Cydymffurfio â’r Datganiad Seilwaith Gwyrdd ynghyd a gwaith cynnal a chadw i’r dyfodol.
6. Sicrhau arwyddion dwyieithog gyda’r flaenoriaeth i’r Gymraeg.
7. Rhaid i'r ymgeisydd gyflwyno i'r Awdurdod Cynllunio Lleol Gynllun Rheoli Traffig Adeiladu (CTMP) fydd yn bodloni Llywodraeth Cymru, fel Sefydliad Goruchwylio ar gyfer y Rhwydwaith Ffyrdd Strategol (SRN).

Amnewid ceblau tanddaearol presennol a gosod ceblau tanddaearol traws-safle newydd yn is-orsaf bresennol Pentir yn ogystal â gwaith cysylltiol

Tynnwyd sylw at y ffurflen sylwadau hwyr -  cyfarwyddyd i osod amod gan Uned Trafnidiaeth Y Cynulliad

a)           Amlygodd y Swyddog Cynllunio bod y bwriad yn rhan o brosiect ehangach ar gyfer atgyfnerthu llinellau uwchben a cheblau ar y cylchedau presennol rhwng is-orsafoedd Pentir a Thrawsfynydd; y Prosiect yn rhan o'r uwchraddiadau trawsyrru rhwydwaith ehangach sydd eu hangen i hwyluso'r gwaith o gysylltu 50 Gigawat o ynni gwynt ar y môr erbyn 2030.

Eglurwyd y byddai’r gwaith arfaethedig yn cael ei gynnwys yn llwyr o fewn ôl-troed presennol Is-orsaf Pentir ac yn defnyddio’r ffordd fynediad presennol, yr ardaloedd storio, y cyfleusterau lles, ystafelloedd swyddfa, a’r maes parcio staff. Cyfeiriwyd at y Datganiad Amgylcheddol oedd yn darparu trosolwg o'r Prosiect, y prif ddewisiadau amgen a gafodd eu hystyried wrth ddatblygu'r Prosiect (lle bo’n briodol), gwybodaeth am yr amgylchedd presennol, ac asesiad o effeithiau arwyddocaol tebygol y Prosiect. Lle bo’n briodol, nodwyd bod mesurau lliniaru wedi cael eu cynnwys i osgoi, atal, lleihau neu wrth bwyso effeithiau amgylcheddol niweidiol arwyddocaol.

Bydd cynyddu capasiti ar y llinell drawsyrru bresennol rhwng is-orsafoedd Pentir a Thrawsfynydd yn cael ei nodi fel cam y mae angen ei gymryd ar frys i ddarparu mwy o gapasiti trawsyrru, ac yn cael ei gydnabod gan Ofgem

Cyfeiriwyd at bolisi ISA 1 sydd yn gefnogol i gynigion am wasanaethau dŵr, trydan, nwy ac ati i wella’r ddarpariaeth leol, yn amodol ar ystyriaethau cynllunio manwl. Yng nghyd-destun polisi ADN 3, er nad yw’r datblygiad yn gynllun ynni adnewyddadwy ynddo’i hun, byddai’n ffurfio rhan o’r rhwydwaith cefnogol a ellid ei ddefnyddio wrth reoli’r cyflenwad adnewyddadwy. I’r perwyl hynny gellid ei ystyried yn rhan o’r rhwydwaith ynni adnewyddadwy. Gwnaed asesiad trylwyr o’r meini prawf perthnasol ac ystyriwyd bod y cynnig yn dderbyniol o ran egwyddor ac yn cydymffurfio gyda Maen Prawf 1 Polisi ADN3 o safbwynt  bod yr holl effeithiau wedi eu lliniaru yn ddigonol. Yn yr un modd nodwyd bod polisïau PCYFF 5, PS 5 , PS 6 a PS 7 yn gefnogol o gynlluniau i ddatblygu technolegau adnewyddadwy sy’n cyfrannu tuag at amddiffyn yr amgylchedd a lliniaru newid hinsawdd a’r cynllun yma felly yn cwrdd gydag amcanion y polisïau hyn.

Yng nghyd-destun materion trafnidiaeth a mynediad, unwaith y bydd yn weithredol ni fydd unrhyw alw am fynediad cerbydol ychwanegol i’r safle ac ni fydd unrhyw effeithiau hirdymor ar ddiogelwch y briffordd yn deillio o’r datblygiad. Nodwyd bod Uned Trafnidiaeth Y Cynulliad yn fodlon gyda’r datblygiad yn ddarostyngedig i amodau ac o ganlyniad ystyriwyd fod y bwriad yn cydymffurfio gyda gofynion Polisi TRA 2 a TRA 4 o’r CDLl o safbwynt diogelwch a hwylustod y briffordd.

O ran materion treftadaeth ac archaeoleg, amlygwyd bod nifer o Henebion Rhestredig yng nghyffiniau'r safle. Nododd Heneb bod yr asesiad desg yn un trylwyr iawn ac wedi’i ysgrifennu’n dda ac roeddynt yn cytuno a chasgliad yr Asesiad o'r Effaith Amgylcheddol (EIA); y cais felly yn dderbyniol  ...  gweld y cofnod llawn ar gyfer eitem 10.