Rhaglen, penderfyniadau a chofnodion drafft

I dderbyn unrhyw ymddiheuriadau am absenoldeb

Derbyniwyd ymddiheuriadau gan y Cynghorydd Berwyn Parry Jones a’r Cynghorydd Gareth A Roberts.

Cydymdeimlwyd gyda’r Cyng. Anne Lloyd Jones oedd wedi colli ei chwaer yn ddiweddar.

I dderbyn unrhyw ddatganiad o fuddiant personol ac i nodi materion protocol. 

Datganodd yr aelodau canlynol eu bod yn aelodau lleol mewn perthynas â’r eitem a nodir:

·        Y Cynghorydd Gareth Williams (nad oedd yn aelod o’r Pwyllgor Cynllunio hwn), yn eitem 5.4 (C25/0418/30/LL) ar y rhaglen

Nodi unrhyw eitemau sy’n fater brys ym marn y cadeirydd fel y gellir eu hystyried.

Fel mater o drefn, adroddwyd, gyda’r Cadeirydd yn ymuno yn rhithiol, mai’r Swyddog Monitro fyddai’n cyhoeddi canlyniad pleidleisiau’r ceisiadau.

Bydd y Cadeirydd yn cynnig y dylid llofnodi cofnodion cyfarfod o’r pwyllgor hwn a gynhaliwyd 20fed o Hydref 2025 fel rhai cywir  

Derbyniodd y Cadeirydd gofnodion cyfarfod blaenorol y pwyllgor hwn a gynhaliwyd 20fed o Hydref 2025 fel rhai cywir yn ddarostyngedig i nodi ‘She’ ac nid ‘He’ yn y cofnod Saesneg ar gyfer sylwadau aelod lleol cais 5.2 (c) C24/0937/16/LL Zip World, Bethesda.

Cyflwyno adroddiad Pennaeth Adran Amgylchedd.

Rhoddodd y Pwyllgor ystyriaeth i’r ceisiadau canlynol i’w datblygu. Ymhelaethwyd ar fanylion y ceisiadau ac ymatebwyd i gwestiynau mewn perthynas â’r cynlluniau ac agweddau o’r polisïau.

Cais o dan Adran 73 ar gyfer diwygio amod 2 o ganiatâd cynllunio cyfeirnod C20/1064/22/AC er mwyn rhoi 4 mlynedd ychwanegol i gwblhau’r gwaith mwynau ac adfer

AELOD LLEOL: Cynghorydd Dafydd Davies

Dolen i'r dogfennau cefndir perthnasol

PENDERFYNIAD: Dirprwyo'r hawl i Bennaeth yr Adran Amgylchedd gymeradwyo'r cais.

Amodau:

·        Dylid rhoi hysbysiad ysgrifenedig i'r Awdurdod Cynllunio Mwynau o leiaf 14 diwrnod cyn : i. Dechrau gwaith adfer ar unrhyw ddarn o’r tir o fewn yr ardal a ganiateir pan ddaw'r defnydd i ben fel cyfleuster siltio ategol ar gyfer unrhyw un o'r tri lagŵn a ddangoswyd ar y cynlluniau cais

·        Daw'r defnydd a ganiateir o'r safle fel lagŵn siltio ategol i ben erbyn 31 Rhagfyr 2028; cwblheir y gwaith adfer wedyn erbyn 31 Rhagfyr 2029 neu pan fydd y gwaith yn dod i ben, pa bynnag un ddaw gyntaf.

·        Gweithgareddau a ganiateir a Chydymffurfiaeth â’r Manylion/Cynlluniau a Gyflwynwyd.

·        Cyfyngu ar yr hawliau datblygu a ganiateir, adeiladau, strwythurau, ffyrdd preifat, llifoleuadau a ffensys.

·        Oriau gweithredu.

·        Ymdrin â phridd a hwsmonaeth.

·        Diogelu hawliau tramwy cyhoeddus.

·        Cyfyngiadau sŵn fel y gwneir eisoes, gosod larymau sŵn gwyn ar beiriannau'r gwaith.

·        Adfer i ddefnydd cymysg amaethyddol a chadwraeth natur.

·        Ni ddylid storio olew, tanwydd a chemegion o fewn safle'r cais.

·        Draenio, mesurau i atal llygru cyrsiau dŵr lleol.

·        Mesurau ôl-ofal ar gyfer defnyddiau amaethyddol a rheoli bioamrywiaeth.

·        Cynllun adfer diwygiedig pe byddai gwaith echdynnu mwynau cynamserol.

·        Rhwygo deunydd craidd y ddaear i osgoi cywasgu arwynebol a chyflawni draenio digonol.

·        Lleiafswm o ddyfnderoedd isbridd ac uwchbridd

Cais o dan Adran 73 ar gyfer diwygio amod 2 o ganiatâd cynllunio cyfeirnod C20/1064/22/AC er mwyn rhoi 4 mlynedd ychwanegol i gwblhau’r gwaith mwynau ac adfer.

Tynnwyd sylw at y ffurflen sylwadau hwyr.

a)       Amlygodd yr Uwch Swyddog Cynllunio Mwynau a Gwastraff bod y cais yn gofyn am ymestyn cyfnod amser gweithredu lagwnau siltio sy’n gysylltiol i’r gwaith prosesu tywod a graen sydd wedi eu cloddio o’r chwarel. Byddai'r dulliau gweithio a phrosesau'r un fath â'r rhai sy'n cael eu defnyddio yn y chwarel ar hyn o bryd.

Yng nghyd-destun egwyddor y datblygiad, nodwyd y byddai parhau i gloddio am dywod a graean yng Nghefn Graianog yn sicrhau bod y Cyngor yn diwallu ei oblygiadau dyraniad yn y Datganiad Technegol Rhanbarthol, i gyflenwi mwynau ar gyfer isranbarth Gogledd Cymru a chadw banc tir saith mlynedd o dywod a graean.  Nodwyd mai ychydig o gronfeydd tywod a graean a ganiateir sydd ar gael yng Ngogledd Orllewin Cymru ac y byddai’r cynnig hwn yn golygu parhad mewn darparu cyflenwad o dywod a graean i'r economi adeiladu leol. Mynegwyd bod cadw’r lagwnau siltio yn hanfodol ar gyfer y gwaith o brosesu, golchi a didoli’r deunydd; yn dderbyniol ac yn cyd-fynd a gofyniad polisïau MWYN 2, MWYN 3 a Pholisi Strategol PS 22 y Cynllun Datblygu Lleol (CDLl).

Yng nghyd-destun mwynderau gweledol a’r dirwedd, eglurwyd bod y cais hwn yn benodol ar gyfer ymestyn cyfnod y datblygiad ac nid yn cynnwys unrhyw estyniad neu addasiadau ffisegol i'r ardal weithio sydd eisoes wedi'i chymeradwyo. Heb os, byddai natur y cynnig i ymestyn oes y gweithrediadau yn ymestyn yr effeithiau gweledol yn y tymor canolig, ond o ystyried ei gyd-destun cyffredinol mewn gwaith mwynau sydd wedi'i sefydlu, ni ystyriwyd y byddai'n arwain at unrhyw lefelau mawr o effeithiau gweledol. Amlygwyd bod ffin AHNE Llŷn yn agos i’r safle, ond derbyniwyd cadarnhad gan yr Uned AHNE nad oedd unrhyw bryderon ynghylch yr effaith ar yr AHNE o ystyried mai dim ond estyniad amser cyfyngedig oedd yma; yr Awdurdod Cynllunio Mwynau yn ystyried bod y bwriad yn cydymffurfio gyda gofynion polisïau PCYFF 3, PCYFF 4 a MWYN 9 y CDLl.

Wrth ystyried mwynderau preswyl, nodwyd bod un eiddo unigol wedi'i leoli o fewn y parth byffer 100m fel y rhagnodir o dan bolisi MWYN 5 CDLl. Bydd y datblygiad yn destun yr un amodau gwaith a’r hyn sydd yn bodoli eisoes, gan gynnwys rheoli sŵn, llwch ac oriau gwaith; yn ddarostyngedig i amodau priodol i reoli effeithiau sŵn a llwch ac oriau gweithio, ni fydd y cynnig yn cael effaith andwyol ar fwynderau'r ardal ac felly'n cydymffurfio â pholisi PCYFF 2, MWYN 3 a MWYN 5 y CDLl.

Nid yw'r bwriad yn cynnwys unrhyw newid i symudiadau traffig a chludo i'r safle ac oddi yno.

Eglurwyd bod asesiad bioamrywiaeth wedi'i ddiweddaru wedi'i gwblhau i gefnogi’r ceisiadau cysylltiol sydd wedi eu cyflwyno ar gyfer ymestyn amser gwahanol ganiatadau’r chwarel. Eglurwyd hefyd bod angen asesu p'un a fu unrhyw newid i'r  ...  gweld y cofnod llawn ar gyfer eitem 6.

Cais o dan Adran 73 ar gyfer diwygio amod 2 o ganiatâd cynllunio cyfeirnod C20/1065/22/AC er mwyn rhoi 4 mlynedd ychwanegol i gwblhau’r gwaith mwynau ac adfer

AELOD LLEOL: Cynghorydd Dafydd Davies

Dolen i'r dogfennau cefndir perthnasol

PENDERFYNIAD:

Dirprwyo'r hawl i Bennaeth yr Adran Amgylchedd gymeradwyo'r cais.

Amodau

·        Bydd echdynnu a phrosesu mwynau yn dod i ben erbyn 31 Rhagfyr 2028 ac erbyn hynny bydd yr holl offer a pheiriannau wedi cael eu symud o'r safle; rhaid cwblhau'r gwaith adfer erbyn 30 Mehefin 2029.

·        Gweithgareddau a Ganiateir a Chydymffurfiaeth â’r Manylion/Cynlluniau a Gyflwynwyd;

·        Cyfyngu ar Hawliau Datblygu a Ganiateir, adeiladau, strwythurau, pethau gaiff eu codi, ffyrdd preifat, llifoleuadau a ffensys.

·        Oriau Gweithio.

·        Trin Pridd a Hwsmonaeth.

·        Draenio, mesurau i atal llygru cyrsiau dŵr lleol.

·        Adolygiad blynyddol o weithrediadau.

·        Diogelu hawliau tramwy cyhoeddus.

·        Adfer i ddefnydd cymysg amaethyddol a chadwraeth natur.

·        Ail-osod terfynau caeau.

·        Mesurau ôl-ofal ar gyfer defnyddiau amaethyddol a rheoli bioamrywiaeth.

·        Rheolaethau llwch a chyfyngiadau sŵn i fod yr un fath ag y gwneir eisoes, a gosod larymau sŵn gwyn ar y peiriannau ar y wyneb gweithio.

·        Lliniaru a chofnodi archeolegol.

·        Gosod gorchudd ar loriau sy'n gadael y safle gyda cherrig llai na 500mm.

·        Cyfyngu mynediad cerbydau i'r trefniadau mynediad presennol.

·        Ni chaniateir cludo deunyddiau sbwriel neu wastraff i'r safle.

·        Y prif ddull o gludo deunydd crai o wyneb y gwaith i'r ffatri brosesu fydd ar gludwr (conveyor) oni chytunir fel arall.

Cais o dan Adran 73 ar gyfer diwygio amod 2 o ganiatâd cynllunio cyfeirnod C20/1065/22/AC er mwyn rhoi 4 mlynedd ychwanegol i gwblhau’r gwaith mwynau ac adfer  

Tynnwyd sylw at y ffurflen sylwadau hwyr

a)           Amlygodd yr Uwch Swyddog Cynllunio Mwynau a Gwastraff bod y cynnig yn gofyn am ymestyn y cyfnod amser hyd at 31 Rhagfyr 2028 i barhau gyda'r gweithrediadau mwynau yn Fferm Graianog. Bydd hyn yn sicrhau nad yw'r gronfa fwynau yn cael ei sterileiddio, ac y bydd modd cwblhau'r gwaith o adfer y safle yn unol â'r cynllun gwaith  a gymeradwywyd a darparu seilwaith ategol i gefnogi'r cynigion i gaffael a gweithio mwynau o'r chwarel. Nid yw'r cynnig yn cynnwys ymestyn ôl-troed y gwaith mwynau ei hun, dim ond ymestyn y cyfnod amser am 4 blynedd arall. Bydd gweithgareddau peiriannau ar y safle, prosesu, cludiant a'r gwaith o gloddio'r mwyn yn cael ei gadw'n llwyr oddi mewn i ffiniau'r safle presennol ac yn unol â thelerau ac amodau'r caniatâd cynllunio cyfredol.

Eglurwyd y byddai'r dulliau gweithio a phrosesau'r un fath â'r rhai sy'n cael eu defnyddio yn y chwarel ar hyn o bryd a byddant yn defnyddio'r un echdynwyr, cludyddion a'r peiriannau symudol eraill fel y rhai presennol.

Yng nghyd-destun egwyddor y datblygiad nodwyd y bydd gwaith cloddio am dywod a graean yn parhau yng Nghefn Graianog yn sicrhau bod y Cyngor yn diwallu ei oblygiadau dyraniad yn y Datganiad Technegol Rhanbarthol, i gyflenwi mwynau ar gyfer is-ranbarth Gogledd Cymru a chadw banc tir saith mlynedd o dywod a graean.  Eglurwyd mai ychydig o gronfeydd tywod a graean a ganiateir sydd ar gael yng Ngogledd Orllewin Cymru ac y  byddai’r  cynnig hwn yn golygu parhad i ddarparu cyflenwad o dywod a graean i'r economi adeiladu lleol; egwyddor y datblygiad yn dderbyniol ac yn cyd-fynd a gofyniad ym mholisïau MWYN 2, MWYN 3 a Pholisi Strategol PS 22 y CDLl.

Yng nghyd-destun mwynderau gweledol a’r dirwedd, nodwyd bod y cais yn benodol ar gyfer ymestyn cyfnod y datblygiad ac nid yw felly’n cynnwys unrhyw estyniad neu addasiadau ffisegol i'r ardal weithio sydd eisoes wedi ei gymeradwyo. Byddai natur y cynnig i ymestyn oes y gweithrediadau yn ymestyn yr effeithiau gweledol yn y tymor canolig, ond o ystyried bod cyd-destun cyffredinol mewn gwaith mwynau wedi'i sefydlu, ni ystyriwyd y byddai'n arwain at unrhyw lefelau mawr o effeithiau gweledol. Amlygwyd bod ffin AHNE Llŷn yn agos i’r safle, ond derbyniwyd cadarnhad gan yr Uned AHNE nad oedd unrhyw bryderon ynghylch yr effaith ar yr AHNE o ystyried mae dim ond estyniad amser cyfyngedig oedd yma; yr Awdurdod Cynllunio Mwynau yn ystyried bod y bwriad yn cydymffurfio gyda gofynion polisïau PCYFF 3, PCYFF 4 a MWYN 9 y CDLl.

Wrth ystyried mwynderau preswyl, nodwyd bod un eiddo unigol wedi'i leoli o fewn y parth byffer 100m fel y rhagnodir o dan bolisi MWYN 5 CDLl. Bydd y datblygiad yn destun yr un amodau gwaith a’r hyn sydd yn bodoli eisoes, gan gynnwys rheoli sŵn,  ...  gweld y cofnod llawn ar gyfer eitem 7.

Gosod cebl trydan tanddaearol mewn perthynas â chynllun cyfleuster storio ynni BESS Pentir  (cyfeirnod yr ACLl: C24/0532/25/LL)

AELODAU LLEOL:  Cynghorydd Menna Baines a’r Cynghorydd Elwyn Jones

Dolen i'r dogfennau cefndir perthnasol

PENDERFYNIAD: Caniatáu yn unol â’r amodau isod:

1.       5 mlynedd.

2.       Yn unol â’r cynlluniau/manylion a gyflwynwyd gyda’r cais.

3.       Cydymffurfiaeth gydag argymhellion y dogfennau Gwerthusiad Ecolegol Cychwynnol, Asesiad Effaith Coedyddiaeth a’r Datganiad Seilwaith Gwyrdd.

4.        Cyflwyno Cynllun Rheolaeth Adeiladu Amgylcheddol er rholi effeithiau ar yr amgylchedd naturiol. 

5.        Cyflwyno Cynllun Rheolaeth Adeiladu er rheoli materion mwynderol.

6.       Cytuno rhaglen waith Archeolegol

7.       Cyflwyno Cynllun Adfer y Safle adfer y safle i gyflwr a gytunir gyda’r Awdurdod Cynllunio wedi i’r cyfnod gweithredol y datblygiad ddod i ben

8.       Cyflwyno cynllun gwaredu Jac y Neidiwr o’r safle

9.       Cyflwyno manylion dull drilio tanddaearol gyda lleoliadau pwyntiau lansio wedi eu lleoli y tu allan i ardaloedd gwarchod gwreiddiau’r coed.

Nodiadau:    

Cyfoeth Naturiol Cymru

Gwasanaeth Cynllunio Archeolegol Gwynedd

Gosod cebl trydan tanddaearol mewn perthynas â chynllun cyfleuster storio ynni BESS Pentir  (cyfeirnod yr ACLl: C24/0532/25/LL) 

Tynnwyd sylw at y ffurflen sylwadau hwyr

a)     Amlygodd y Rheolwr Cynllunio mai cais cynllunio llawn ydoedd ar gyfer gosod cebl tanddaearol 830m rhwng is-orsaf drydan Pentir a’r cyfleuster System Storio Ynni Batri gerllaw a gymeradwywyd trwy ganiatâd cynllunio yn 2024. Disgwylid i'r cyfnod gosod gymryd uchafswm o 10 wythnos, gyda’r cebl yn cael ei osod o dan y ddaear naill ai drwy ffosydd wedi'u cloddio ar yr wyneb ac wedi'u llenwi'n ôl, neu drwy Ddrilio Cyfeiriadol Llorweddol.

Eglurwyd bod y safle mewn safle Cefn Gwlad Agored ac o fewn Tirwedd o Ddiddordeb Hanesyddol Eithriadol Dinorwig gyda rhan fechan o fewn Parth Llifogi 3 (dŵr wyneb a chyrsiau dŵr). I’r gogledd o’r safle mae’r coetir cyfagos yn “Safle Bywyd Gwyllt Rhanbarthol” cydnabyddedig ac wedi ei restru ar Restr Coetiroedd Hynafol fel “Planhigfa ar Safle Coetir Hynafol”. Nodwyd hefyd bod y tir wedi’i ddosbarthu’n 3a, 3b a 5 ar y Map Dosbarthiadau Tir Amaethyddol rhagfynegol ar gyfer Cymru.

Gyda’r bwriad wedi ei leoli ar gyfer cysylltu dau safle sydd eisoes â chaniatâd, amlygwyd bod y lleoliad gwledig yn anorfod. Tynnwyd sylw at bolisi ISA 1 sy’n gefnogol i gynigion am wasanaethau dŵr, trydan, nwy ac ati i wella’r ddarpariaeth, yn amodol ar ystyriaethau cynllunio manwl; y polisi yn nodi pwysigrwydd bod y ddarpariaeth isadeiledd ar gyfer safle datblygu yn cael ei leoli a’i ddylunio mewn modd sy’n lleihau’r effaith ar yr amgylchedd naturiol ac adeiledig. Bydd y datblygiad yma yn cael ei osod yn gyfan gwbl dan y ddaear, ac felly ystyriwyd bod y bwriad yn cydymffurfio a gofynion ISA 1. 

Bydd y dull o osod y cebl yn gymysgedd o ddarparu ffosydd wedi'u cloddio ar yr wyneb ac wedi'u llenwi'n ôl, neu drwy Ddrilio Cyfeiriadol Llorweddol o fewn ardaloedd ble mae angen gwarchod gwreiddiau coed a rhywogaethau sy’n byw yn y coed. Mae’r ardaloedd a fydd yn destun y dull drilio wedi eu hamlygu, hynny’n rhannol o ganlyniad i sylwadau Cyfoeth Naturiol Cymru. Mae’r cadarnhad o ddefnyddio’r dull drilio yn yr ardaloedd penodol yma ynghyd a gosod amod cynllunio ar gyfer cytuno pwyntiau lansio’r dull drilio yn sicrhau bod y coed a’r rhywogaethau yn cael eu gwarchod. O ganlyniad, ystyriwyd fod y bwriad yn dderbyniol. Ategwyd bod Cyfoeth Naturiol Cymru wedi darparu ymateb ar y 14eg o Dachwedd yn nodi eu bod bellach yn fodlon gyda’r cynnig; Ni fydd effaith uwchddaear yn dilyn gosod y cebl ac felly ni ystyriwyd y byddai’n cael effaith hirdymor ar unrhyw gynefin na’r tir amaethyddol.

Cydnabuwyd y bydd  anghyfleustod o ran sŵn a symudiad yn ystod y cyfnod adeiladu, ond ystyriwyd bod y cyfnod yma yn fyr, ac yn ddarostyngedig i amodau sy’n ymdrin â materion sŵn, llwch a dirgryniad, ynghyd a chytuno Cynllun Rheoli Adeiladu ymlaen llaw, ystyriwyd y gallai leddfu unrhyw effeithiau ac felly'r bwriad yn dderbyniol yn y cyd-destun yma.

Cyfeiriwyd at faterion trafnidiaeth, iaith, a llifogydd oedd  ...  gweld y cofnod llawn ar gyfer eitem 8.

Cais llawn i godi 8 tŷ fforddiadwy (safle eithrio) gyda datblygiadau cysylltiedig gan gynnwys creu mynedfa gerbydol, ffordd stâd, tirlunio ac ardal draenio dwr wyneb cynaliadwy 

AELOD LLEOL: Cynghorydd Gareth Williams

Dolen i'r dogfennau cefndir perthnasol

PENDERFYNIAD: Gohirio penderfyniad a chynnal ymweliad safle

Rheswm: I asesu effaith y bwriad ar fwynderau’r trigolion cyfagos

Cais llawn i godi 8 tŷ par fforddiadwy (safle eithrio) gyda datblygiadau cysylltiedig gan gynnwys creu mynedfa gerbydol, ffordd stad, tirlunio ac ardal draenio dŵr wyneb cynaliadwy 

            Tynnwyd sylw at y ffurflen sylwadau hwyr

a)               Amlygodd y Rheolwr Cynllunio bod y bwriad yn cynnwys codi 3 byngalo 2 ystafell wely, 4 tŷ deulawr 3 ystafell wely ac1 tŷ deulawr 4 ystafell wely i gyd i’w orffen gyda chymysgedd o rendr, cladin carreg a choed ar y waliau a tho llechen naturiol. Ategwyd bod clawdd naturiol presennol i flaen y safle i’w drawsleoli i ffin ogleddol y safle gyda gwrychoedd newydd i’w codi ar weddill ffiniau’r safle.

Adroddwyd bod safle’r datblygiad arfaethedig yn bresennol yn dir amaethyddol agored gyda ffiniau o’i amgylch yn bennaf yn wrychoedd naturiol gyda thai preswyl yn gyfochrog a’r safle i gyfeiriad y gogledd, gorllewin a’r de gydag edrychiadau o ran dyluniad, ffurf a gorffeniadau amrywiol. Saif y cyfan tu allan i ffin ddatblygu gyfredol pentref Aberdaron ac felly yng nghefn gwlad agored gyda ffin orllewinol a deheuol y safle arfaethedig yn cyffwrdd a’r ffin datblygu bresennol. Ategwyd bod ffordd gyhoeddus dosbarth 3 wedi ei leoli yn gyfochrog gyda’r ffin orllewinol a’r hyn fyddai blaen y safle, gyda mynediad a hawl tramwy i mewn i diroedd amaethyddol yn rhedeg ar hyd ffin ogleddol y tir. Y safle oddi mewn dynodiadau AHNE Llŷn a Thirlun o Ddiddordeb Hanesyddol Eithriadol Llŷn ac Ynys Enlli ac o fewn parth 500m i heneb gofrestredig.

Eglurwyd bod pentref Aberdaron wedi ei ddiffinio fel pentref gwledig / arfordirol yn y CDLl gydag oddeutu 95 o dai ac ychydig o gyfleusterau o fewn y ffin datblygu gyfredol. Ar sail maint yr anheddle nodwyd bod y datblygiad yn golygu twf o 7.6% i’r anheddle, ond gyda chaniatâd diweddar wedi ei gymeradwyo ar gyfer safle eithrio arall am 5 uned i’r anheddle, bydd twf o 12.35% yn ei gyfanrwydd sy’n gyfystyr a’r lefel twf disgwyliedig i’r anheddle yma.

Gyda’r safle wedi ei leoli y tu allan i’r ffin datblygu disgwylid i’r holl unedau fod ar gyfer angen fforddiadwy lleol. Ar gyfer Aberdaron diffinnir hyn fel pobl sydd mewn angen tŷ fforddiadwy ac sydd wedi byw o fewn y Pentref, neu yn yr ardal wledig o gwmpas am bum mlynedd neu fwy yn olynol, unai yn union cyn cyflwyno cais neu yn y gorffennol. Diffiniwyd ‘ardal wledig’ yn yr achos yma fel pellter o 6km o safle'r cais a holl ardal unrhyw Gyngor Cymuned sy'n cael ei rannu gan y pellter 6km, gan eithrio eiddo o fewn ffin datblygu unrhyw anheddiad oni bai am yr anheddiad hwnnw lle mae’r cais wedi’i leoli.

Cyflwynwyd tystiolaeth ar ffurf Datganiad Anghenion Tai a Thai Fforddiadwy sy’n cyfeirio at angen sydd wedi ei amlygu ar Gofrestr Tai Cymdeithasol a Thai Teg yn Aberdaron a phentref Rhiw, gan nodi fod Rhiw wedi ei leoli o fewn 6km i’r dwyrain o Aberdaron ac nad yw wedi ei gynnwys fel anheddiad dynodedig, gan gynnwys clwstwr, ac  ...  gweld y cofnod llawn ar gyfer eitem 9.